گوکرن: شوہر کی لاش دیکھ کر رنجیدہ بیوی نے کی خود کشی
گوکرن 15؍جولائی (ایس او نیوز)بیماری کی وجہ سے اسپتال میں داخل کیے گئے شوہر کی جب موت واقع ہوئی اور اس کی لاش گھر لائی گئی تو صدمے سے بے حال بیوی نے گھر کے پاس واقع کنویں چھلانگ لگا کر خود کشی کرلی۔
موصولہ رپورٹ کے مطابق یہ واردات گوکرن سے قریب آگر کون میں پیش آئی۔ کہاجاتا ہے کہ وٹھّل شیٹھ (55سال) نامی شخص کافی دنوں سے بیمار تھا اور اسے اسپتال میں رکھا گیا تھا۔ علاج کارگر نہ ہونے سے اس کی موت واقع ہوگئی ۔پھر جب اس کے رشتے دار لاش کو آگر کون میں واقع اس کے گھر پر لائے تو وٹّھل کی بیوی منگلا شیٹھ(50سال) صدمے سے بے حال ہوگئی اور اچانک دوڑتی ہوئی کنویں کے پاس پہنچ کر چھلانگ لگادی۔ جب تک اسے کنویں سے نکالا جاتا اس کی بھی موت واقع ہوچکی تھی۔
کہتے ہیں کہ اس جوڑے کی کوئی اولاد نہیں تھی۔ دوسروں کے گھروں میں چھوٹے موٹے کام انجام دے کر یہ لوگ زندگی کے دن بسر کررہے تھے۔ اس بزرگ جوڑے کے بیک وقت موت سے پورے آگرکون قصبے کے ماحول پر غم اور سوگ طاری ہوگیا۔پولیس نے خودکشی کا معاملہ درج کرنے کے بعد گوکرن سرکاری اسپتال میں لاش کا پوسٹ مارٹم کروایا۔ جس کے بعد دونوں میاں بیوی کی آخری رسومات ادا کردی گئیں۔