سعودی عربیہ کے جدہ ۔مکہ ہائی وے پر تیز رفتار کار کی پٹرول ٹینکر سے ٹکر؛ ٹینکر پھٹ پڑا؛ کار ڈرائیور ہلاک
جدہ 21/اپریل (ایس او نیوز) جدہ ۔ مکّہ ایکسپریس ہائی وے پر ایک تیزرفتار کار کے ایک پٹرول سے بھرے ٹینکر کو ٹکر دینے کی نتیجے میں پوری ٹینکر کو آگ لگنے کے بعد ٹینکر دھماکے کے ساتھ پھٹنے کی واردات پیش آئی، جس میں کار ڈرائیور جائے وقوع پر ہی جل کر داعی اجل کو لبیک کہہ گیا، جبکہ دیگر تین کو فوری طور پر بچا لیا گیا۔ سعودی گزٹ کی اطلاع کے مطابق حادثہ جمعرات اور جمعہ کی درمیانی شب کو پیش آیا، جس کے بعد پورا ہائی وے بلاک ہوگیا۔ رپورٹ کے مطابق بعد میں سواریوں کو دوسرے راستے کی طرف موڑ دیا گیا۔
رپورٹ میں مرنے والے ڈرائیور کی شناخت نہیں بتائی گئی ہے،ا لبتہ حادثے کے فوری بعد دیگر دو کاریں بھی آگ کے شعلے کی لپیٹ میں آنے کی خبر دی گئی ہے۔
جمعہ کو سوشیل میڈیا میں وائرل ہونے والی وڈیو کلپ پر بھروسہ کریں تو حادثے کے فوری بعد ہائی وے پر کافی فاصلے تک آگ کے بلند شعلے دیکھے گئے ہیں، جہاں سے سواریوں کا گذر ناممکن لگ رہا تھا۔ جبکہ سوشیل میڈیا میں وائرل ہونے والے فوٹوز میں فائر بریگیڈ کے عملے کو آگ پر قابو پانے کی کوشش کرتے ہوئے دیکھا گیا ہے۔
بتایا گیا ہے کہ ٹینکر میں 33 ٹن پیٹرول بھرا ہوا تھا، کار کے ٹکراتے ہی ٹینکر سے پٹرول رسنے لگا جس کے ساتھ ہی ٹینکر میں آگ لگ گئی ۔ جمعہ کی صبح تک آگ پر قابو پالیاگیا تھا ۔
خیال رہے کہ جدہ انٹرنیشنل ائرپورٹ پر اُترنے کے بعد مکہ جانے کے لئے ایکسپریس ہائی وے کا استعمال کیا جاتا ہے، مگر حادثہ پیش آنے پر بعد میں اولڈ مکہ روڈ پر سواریوں کو موڑ دیا گیا تھا۔