بھٹکل میں فری میڈیکل چیک آپ کیمپ کا کامیاب انعقاد؛ 202 لوگوں نے کیا ہیلتھ چیک آپ
بھٹکل 25/ستمبر (ایس او نیوز) انڈیانا اسپتال مینگلور اور بھٹکل مسلم ہیلتھ فائونڈیشن کے زیراہتمام شہر کے آسیہ اسپتال میں منعقدہ مفت میڈیکل چیک آپ کیمپ میں 202 لوگوں نے اپنی صحت کی جانچ کی اور مینگلور سے تشریف فرما ماہر ڈاکٹروں سے صلاح حاصل کی۔ صبح نو بجے جب کیمپ کا افتتاح ہوا تو لوگوں کی کثیر تعداد سے اسپتال بھر گیا۔ کیمپ دوپہر دو بجے تک چلانے کا اعلان کیا گیا تھا، مگر چیک ا ٓپ کے لئے آئے ہوئے لوگوں کی تعداد اتنی زیادہ تھی کہ 3:30 بجے کے بعد تمام لوگوں کی جانچ کے بعد ہی کیمپ اختتام کو پہنچ سکا۔
مینگلور کے معروف کارڈیالوجسٹ اور انڈیانا اسپتال کے کرتادھرتا ڈاکٹر یوسف کمبلے، ڈاکٹر پردیپ کے جے، ڈاکٹر ابھیجیت شٹی اور ڈاکٹر ادتیہ نے تمام لوگوں کی اطمینان کے ساتھ جانچ کی۔ جملہ 38 لوگوں کی ای سی جی اور 35 لوگوں کو ایکو کرایا گیا، کچھ لوگوں کو مینگلور انڈیانا اسپتال آکر انجیوگرام کرانے کی بھی صلاح دی گئی۔
کیمپ میں شریک ہونے والوں کے لئے خصوصی رعایت: اخبار نویسوں سے گفتگو کرتے ہوئے مسلم ہیلتھ فائونڈیشن کے بانی و جنرل سکریٹری جناب اقبال سہیل جاوید (عرف سٹی میڈیکل اقبال ) نے بتایا کہ میڈیکل کیمپ کے فوری بعد انڈیانا اسپتال کے ڈاکٹر یوسف کمبلے سے میٹنگ منعقد کی گئی تھی جس میں اُن سے درخواست کی گئ تھی کہ بھٹکل سے مینگلور صرف انجیو گرام اور اسکیننگ کے لئے جانا پڑتا ہے، اور بھٹکل میں کئی لوگ بے حد غریب ہیں، لہٰذا ایسوں کو خصوصی رعایت دی جائے، ڈاکٹر یوسف کمبلے نے اس موقع پر ایسے مریضوں کے لئے مینگلوران کے اسپتال میں انجیو گرام کرنے پر 25 فیصد رعایت دینے کا اعلان کیا ہے، ساتھ ساتھ اسکیننگ کرنے پر بھی خصوصی رعایت دینے کا وعدہ کیا ہے۔ مگر یہ رعایت صرف اُن مریضوں کو دی جائے گی جو بھٹکل کے مسلم ہیلتھ فائونڈیشن کی جانب سے ایک درخواست لیٹر لے کر جائیں گے۔
بھٹکل میں ایمرجنسی مریضوں کے لئے سیٹ آپ: مسلم ہیلتھ فائونڈیشن کی درخواست پر انڈیانا اسپتال کا ایک سیٹ آپ بھٹکل میں قائم کرنے ڈاکٹر یوسف کمبلے راضی ہوئے ہیں اور کہا ہے کہ یہاں کے عوام اور مسلم ہیلتھ فائونڈیشن اگر تعائون کرتا ہے تو بھٹکل میں ایک شاخ اگلے تین ماہ کے اندر کھولیں گے۔ ڈاکٹر یوسف کمبلے نے وعدہ کیا ہے کہ بھٹکل میں ہی ماہر ڈاکٹروں کی خدمات فراہم کی جائے گی جو بالخصوص ڈیلیوری کیسس اور ہارٹ کے مریضوں کی ایمرجنسی کے موقع پر بھٹکل میں ہی جانچ کریں گے اور بھٹکل میں ہی ہرممکن علاج کیاجائے گا۔
بھٹکل آسیہ اسپتال میں فری میڈیکل چیک آپ کیمپ کے موقع پر جنرل سکریٹریاقبال سہیل جاوید سمیت صدر جناب عبدالکلام شاہ بندری، نائب صدر مولانا انصار مدنی، مولانا رحمت اللہ اور مولانا عمران صاحب پیش پیش تھے۔