بھٹکل میں تنظیم کی جانب سے 19/اکتوبر سے ہوگا پانچ روزہ میڈیا ورک شاپ؛ معروف صحافیوں کی شرکت متوقع
بھٹکل 16/جولائی (ایس او نیوز) بھٹکل کا قومی سماجی ادارہ مجلس اصلاح و تنظیم کی جانب سے اسی سال اکتوبر میں پانچ روزہ میڈیا ورک شاپ منعقد کیا جارہا ہے جس میں میڈیا کے میدان میں دلچسپی رکھنے والے طلبا کو میڈیا کے تعلق سے بھرپور معلومات فراہم کی جائے گی اور اُنہیں آگے کے مراحل بھی طئے کرنے ہرممکن سہولیات فراہم کی جائے گی۔ اس بات کی اطلاع تنظیم کی میڈیا واچ کمیٹی کے کنوینر جناب آفتاب حُسین کولا نے دی ۔ انہوں نے بتایا کہ ورک شاپ میں ملک کے معروف صحافیوں کو مدعو کیا گیا ہے۔
انہوں نے بتایا کہ مسلمانوں کی صحیح ترجمانی اور ملت کی صحیح رہنمائی کے لئے آج قوم و ملت کو اچھے صحافی کی ضرورت ہے۔ وقت اور حالات آواز دے رہے ہیں کہ مسلم نوجوان صحافت کے میدان میں قدم بڑھائیں۔
میڈیا کے متعلق نوجوانوں میں بیداری پیدا کرنے اس ورکشاپ کا انعقاد کیا گیا ہے جس میں پرفیشنلس کی مدد سے کالج طلبا کو میڈیا کے تعلق سے ضروری ٹریننگ فراہم کی جائے گی۔
اس موقع پر گفتگو کرتے ہوئے تنظیم کے جنرل سکریٹری محی الدین الطاف کھروری نے بتایا کہ ورکشاپ میں شریک ہونے والے ایسے طلبا جو ماس میڈیا کمیونیکشن میں آگے بڑھنا چاہتےہوں یا جرنلزم میں ڈگری لینا چاہتے ہوں، اُنہیں تنظیم کی جانب سے ہر ممکن سہولیات فراہم کی جائے گی۔
ورکشاپ کے تعلق سے الطاف کھروری نے بتایا کہ مورخہ 19/اکتوبر کو ورکشاپ کی افتتاحی تقریب ہوگی، جس میں عوام الناس سے خطاب کرنے معروف صحافی رویش کمار کو مدعو کیا گیا ہے، پروگرام میں دیگر بڑے صحافیوں کو مدعو کرنا بھی زیرغور ہے۔ جبکہ اگلے دن یعنی 20/اکتوبر سے 24/اکتوبر تک کالج طلبا کے لئے پانچ دنوں کا ورکشاپ ہوگا ۔
ورکشاپ کو اعلیٰ پیمانے پر منعقد کرنے کے لئے تیاریاں شروع کی گئی ہیں۔ انہوں نے عوام الناس بالخصوص اندرون ہند اور بیرون ہند کی جماعتوں سے اس تعلق سے مکمل تعائون فراہم کرنے کی درخواست کی ہے۔
میڈیا ورکشاپ میں بھٹکل سے کمٹہ تک کے کالج اسٹوڈینٹس شریک ہوسکتے ہیں اور جملہ پچاس طلبہ کی گنجائش رکھی گئی ہے۔ ورکشاپ میں شریک ہونے والے طلبا اپنا پورا نام، پاسپورٹ سائز فوٹو، تعلیم ، کالج نام اور اڈرس مندرجہ ذیل ای میل پر روانہ کرسکتے ہیں: [email protected] موبائل نمبر 9900369666 پر درکار تفصیلات وہاٹس ایپ کے ذریعے بھی روانہ کی جاسکتی ہے۔