ممبئی:15/دسمبر (ایس او نیوز/آئی این ایس انڈیا) انڈر ورلڈ ڈان چھوٹا شکیل کے بھائی انور کو ابو ظہبی کے ایئر پورٹ پر کسٹم پولیس نے جمعہ کو گرفتار کر لیا ہے۔ انور کے پاس پاکستان کا پاسپورٹ ہے۔گرفتاری کے بعد بھارتی سفارت خانہ چھوٹا شکیل کے بھائی انور کو اپنے گرفت میں لینے کی کوششوں میں مصروف ہے جبکہ پاکستانی سفارت خانہ بھی اسے پکڑنے کی کوشش میں ہے۔ پاکستان کا دعوی ہے کہ انور کے پاس پاکستان کا پاسپورٹ ہے، اس لحاظ سے اس کے سپرد کیا جانا چاہئے۔مقامی حکام کا کہنا ہے کہ انور کے بارے میں پختہ معلومات ملنے کے بعد اس کو پکڑ ا جا سکا ہے۔انور بابو شیخ کے خلاف پہلے ہی ریڈ کارنر نوٹس جاری ہے ۔ انور کے بارے میں کہا جاتا ہے کہ وہ آئی ایس آئی کے ساتھ کام کر رہا ہے اور ہندوستان کے خلاف دہشت گردانہ سرگرمیوں میں بھی مبینہ طور پر ملوث ہے۔مافیا ڈان چھوٹا شکیل کا اصلی نام شکیل بابومیاں شیخ ہے۔ مافیا ڈان چھوٹا شکیل 1993 میں ممبئی میں ہوئے سیریل بم بلاسٹ کے اہم ملزمان میں سے ایک ہے۔ اس انڈرورلڈ کے سب سے بڑے ڈان داؤد ابراہیم کا خاص آدمی سمجھا جاتا ہے۔ ہتھیاروں کی اسمگلنگ کرنا اور تاوان وصولنا اس کا اہم دھندہ ہے۔بالی وڈ کی مشہور شخصیات کے ساتھ اس کے تعلقات اکثر چرچا کی وجہ بنے ہیں ۔چھوٹا شکیل نے ایک نجی ٹی وی کو دیے گئے ایک انٹرویو میں خود اس بات کا ذکر کیا تھا۔ راجن کے پکڑے جانے کے بعد چھوٹا شکیل نے دھمکی دی تھی کہ وہ راجن کو جیل میں گھس کر ماریں گے۔ اس دھمکی کے بعد جیل میں قید چھوٹا راجن کی سیکورٹی بڑھا دی گئی ہے ۔