کانگریس نے’ چھوٹی سی لنگوٹ بند پارٹی ‘کو جھک کر سلام مارااوراوندھے منھ گِرگئی؛ کمٹہ میں آننت کمارہیگڈے کا بیان
کمٹہ3؍جون (ایس او نیوز) ترقیاتی کام کے بجائے ہندوتوا کے نام پر عوام کو تقسیم کرکے انتخابات میں جیت درج کرنے میں ماہر مرکزی وزیر اننت کمار ہیگڈے نے کہا ہے کہ اس دیش پر گزشتہ 70سالوں سے حکومت کرنے والی کانگریس والوں کے لئے سیاست کا مطلب صرف راستے، لائٹ اور سڑکوں کی درستی کے علاوہ کچھ بھی نہیں ہے۔یہی وجہ ہے کہ آج پورے ملک میں وہ پارٹی تباہ ہوتی جارہی ہے۔کانگریس کا مذاق اڑاتے ہوئے انہوں نے جے ڈی ایس کانام لیے بغیر کہا کہ اقتدار کی ہوس میں کانگریس نے چھوٹی سی’ لنگوٹ بند پارٹی‘ کو جھک کر سلام مارا ہے اور اوندھے منھ گِرگئی ہے۔اننت کمار ہیگڈے ضلع بی جے پی کی طرف سے انتخاب جیتنے والے اراکین اسمبلی اور پارٹی کارکنان کے لئے کمٹہ ہاوئیک ہال میں منعقدہ تہنیتی اجلاس میں بول رہے تھے۔
ضلع کی چھ سیٹیں بھی بی جے پی کوملیں گی!: اس پروگرام میں اننت کمار ہیگڈے نے ایک چونکانے والا بیان دیتے ہوئے کہا کہ ریاست میں بی جے پی کو 104 سیٹیں جو ملی ہیں، اس میں ہماری اپنی کوتاہی ہے ۔ ہم عوام کے سامنے بی جے پی کا پیغام پوری طرح رکھنے میں ناکام رہے ہیں۔ اس کے علاوہ ضلع شمالی کینرا کی 6 سیٹیں بی جے پی کو ملی ہیں۔ 2سیٹیں کم ملنے کی ذمہ داری میں اپنے سر لیتا ہوں لیکن آئندہ اسمبلی انتخابات میں تمام چھ سیٹیں بی جے پی کو دلاکر میں سیاست سے ریٹائر ہوجاؤں گا۔ انہوں نے بڑے معنی خیز انداز میں کہا کہ آئندہ اسمبلی انتخاب میں ہلیال کی نشست پر بی جے پی سے آر وی دیشپانڈے یا کوئی اور انتخاب لڑے گا۔ اسی طرح یلاپور کی سیٹ بھی میں بی جے پی کو دلاؤں گا۔
ایم پی کے لئے دوسرا امیدوار ڈھونڈو!: اننت کمار ہیگڈے نے کہا کہ ضلع شمالی کینرا سے مجھے آپ لوگوں نے پانچ مرتبہ رکن پارلیمان منتخب کیا ہے۔ آئندہ لوک سبھا انتخاب میں بھی بی جے پی کو ہی جیتنا ہے۔میں نے اس مرتبہ الیکشن لڑنے کے بارے میں ایک لمحے کے لئے بھی سوچا نہیں ہے۔میں نے ضلعی صدر کو بتادیا ہے کہ وہ آئندہ انتخاب کے لئے میری جگہ پر کسی اور امیدوار کو ڈھونڈلیں۔
اس موقع پر پارٹی کے کارکنان اور منتخب اراکین اسمبلی کو اننت کمار نے پارٹی سے جڑے رہنے اور پارٹی کی جیت کو مستقبل میں بھی یقینی بنانے کے سلسلے میں مشورے اور نصیحتیں دیں۔ اس کے بعد چاروں منتخب اراکین اسمبلی کو اعزاز پیش کیاگیا۔