کانگریس اجلاس:راہل گاندھی کو ملا سی ڈبلیو سی ، اب کریں گے نئی ورکنگ کمیٹی کا قیام
نئی دہلی،18؍ مارچ (ایس او نیوز؍آئی این ایس انڈیا)دہلی میں چل رہے کانگریس سیشن میں کانگریس صدر راہل گاندھی کو کانگریس کی نئی ورکنگ کمیٹی کی تشکیل کے لئے متفقہ طور پر اختیار دیاگیاہے۔یعنی اب ورکنگ کمیٹی میں کون کون سے رہنما شامل ہوں گے یہ فیصلہ راہل گاندھی کریں گے۔
کانگریس ورکنگ کمیٹی میں 25رکن ہوتے ہیں۔اس میں ایک خود راہل گاندھی، دوسری پارلیمانی پارٹی کی حیثیت سے سونیا گاندھی اور ان کے علاوہ کئی اور ارکان ہوتے ہیں۔کانگریس کے آئین کے مطابق ان میں سے 11 رکن منتخب ہوتا ہے اور 12 کو نامزد کیا جاتا ہے۔وہیں اس سے پہلے کانگریس کے 84ویں اجلا س میں حکمراں بی جے پی کا نام لئے بغیر ہفتہ کو راہل گاندھی نے مرکزی حکومت پر ملک میں انتشار پیداکرنے اور نوجوانوں اور کسانوں کو وزیر اعظم نریندر مودی کے ذریعہ کوئی ترقی نہ مل پانے کا الزام لگایا۔انہوں نے کہا کہ صرف کانگریس ہی ملک کو ایک نئی سمت دے سکتی ہے۔راہل نے کہاکہ ملک میں انتشار پھیلایا جا رہا ہے۔ملک کو تقسیم کیا جا رہا ہے۔ہندوستان کے ایک شخص کو دوسرے شخص سے لڑایا جا رہا ہے۔انہوں نے کہا کہ ہمارا کام جوڑنے کا ہے۔یہ ہاتھ کا نشان (کانگریس کا انتخابی نشان)ہی ملک کو جوڑسکتا ہے۔ملک کو آگے لے جا سکتا ہے۔راہل نے کہا کہ کانگریس کے اس نشان کی طاقت اپنی پارٹی نمائندوں کے اندر ہے۔ہم سب کو مل کر ملک کو جوڑنے کا کام کرنا ہوگا۔