صدارتی انتخابات کیلئے کانگریس اراکین کو وہپ جاری
بنگلورو:11/ جولائی(ایس اونیوز) 17 جولائی کو ہونے والے صدارتی انتخابات میں تمام کانگریس اراکین کو لازمی طور پر حصہ لینے کی ہدایت کے ساتھ کانگریس لیجسلیچر پارٹی نے وہپ جاری کی ہے۔ کانگریس لیجسلچر پارٹی لیڈر وزیر اعلیٰ سدرامیا اور پارٹی کے چیف وہپ اشوک پٹن کی طرف سے اراکین اسمبلی کو یہ وہپ جاری کی گئی ہے، جبکہ لوک سبھا میں کانگریس کے چیف وہپ کی طرف سے بھی اراکین لوک سبھا کو پارٹی کی امیدوار میرا کمار کے حق میں ووٹ استعمال کرنے کیلئے وہپ جاری کی گئی ہے۔ صدارتی انتخابات میں جہاں یو پی اے نے لوک سبھا کی سابق اسپیکر میرا کمار کو میدان میں اتارا ہے تو دوسری طرف وزیر اعظم مودی کی قیادت والے این ڈی اے نے بہار کے سابق گورنر رام ناتھ کووند کو میدان میں اتارا ہے۔ انتخابی مہم کے سلسلہ میں میرا کمار نے کرناٹک کا دورہ کیا ہے اور یہاں کے اراکین پارلیمان اور اسمبلی کے ساتھ تبادلہئ خیال کے ذریعہ انہیں ووٹ دینے کی اپیل بھی کی ہے۔