چھتیس گڑھ: 4 ماہ میں 63 تصادم، 32 نکسلی ڈھیر اور 276 گرفتار
رائے پور،29اپریل(ایس او نیوز/آئی این ایس انڈیا) چھتیس گڑھ میں اس سال کے چار ماہ میں 63 تصادم ہوئے۔ ان میں جوانوں نے 32 نکسلیوں کو مار گرایا اور 276 کو گرفتار کیا۔ یہ معلومات ریاست کے وزیر داخلہ رام سیوک پیکرا نے اسمبلی میں ایک تحریری بیان میں دی۔ وہ برکاپال میں ہوئے تصادم میں سی آر پی ایف کی 74 ویں بٹالین کے 25 جوانوں کی شہادت کو لے کر ایوان میں حکومت کا موقف رکھ رہے تھے۔ انہوں نے بتایا کہ اس دوران ہمارے جوانوں نے انٹیلی جنس اطلاعات کی بنیاد پر 114 آئی ای ڈی(جس کا کل وزن 6 سو کلو گرام بتایا گیا) برآمد کیا۔حکومت سرینڈرکرنے اور بحالی پالیسی کو کامیاب قرار دیتے ہوئے انہوں نے بتایا کہ سال 2014 سے لے کر اب تک 2218 نکسلیوں نے سرینڈر کیا، تو وہیں اس مدت میں سیکورٹی فورسز کے تعاون سے چار سو کلو میٹر سے زیادہ طویل سڑکوں کی تعمیر کی گئی۔وزیر داخلہ نے اپنے تحریری بیان میں کہا کہ اپوزیشن کا انٹیلی جنس کے نظام کی ناکامی والا بیان بھی بے بنیاد ہے، آئی ای ڈی اور ہتھیاروں کی برآمدگی، بغیر انٹیلی جنس اطلاعات کے نہیں ہو سکتی، لہذا، ہمیں یہ مان کر چلناہوگا کہ ہمارا انٹیلی جنس کے نظام اپنا کام بخوبی کر رہا ہے۔