بھٹکل 27/ستمبر (ایس او نیوز) مدینہ کالونی، نوائط کالونی، آزاد نگر وغیرہ کے علاقوں کے لوگوں کو اب آدھار کارڈ کو راشن کارڈ سے جوڑنے کے لئے شہر سے دورجالی پنچایت دفتر جانے کی ضرورت نہیں ہے، مدینہ کالونی میں واقع مدینہ ویلفئر سوسائٹی کے دفتر میں پہنچ کر یہ کام کیاجاسکتا ہے۔ علاقوں کے عوام کے لئے کہا گیا ہے کہ خاندان کا کوئی ایک فرد اپنے شناختی کارڈ اور آدھار کارڈ کے ساتھ راشن کارڈ اور دیگراہل خانہ کے آدھار کارڈ لے کر سینٹر پہنچیں اور آدھار کارڈ کے ساتھ راشن کارڈ کا لنک جوڑیں۔

ساحل آن لائن سے گفتگو کرتے ہوئے مدینہ ویلفئیر سوسائٹی کے جنرل سکریٹری مولانا ایس ایم عرفان ندوی نے بتایا کہ عوام بالخصوص خواتین شہر سے کافی دورجالی پنچایت دفتر پہنچ کر کافی وقت ضائع کررہی تھی اور وہاں لمبی لمبی قطاروں میں ٹہر کر اکثر لوگ واپس آتے تھے،وہاں پر بالخصوص خواتین کو کافی دشواریاں ہورہی تھیں جسے دیکھتے ہوئے اب شہر کے بیچوں بیچ مدینہ ویلفئیر سوسائٹی کے دفتر میں ہی یہ سنٹر قائم کیا گیا ہے۔ جالی پنچایت ممبر آفتاب دامودی نے بتایا کہ جالی جیسے دوردراز علاقوں میں اکثر خواتین آٹورکشہ پر جاتی تھیں اوروہاں عوام کا ہجوم دیکھ کراکثر خواتین واپس لوٹ آتی تھیں، یہ سب دیکھ کر سرکاری آفسران سے گفتگو کرتے ہوئے یہ سروس سینٹر اب مدینہ کالونی میں شروع کیا گیا ہے، ضرورت اس بات کی ہے کہ مدینہ کالونی سمیت اطراف کے عوام اس سروس سے فائدہ اُٹھائیں اور پہلی فرصت میں آدھار کارڈ کو راشن کارڈ سے جوڑنے کا کام انجام دیں۔ آفتاب نے بتایا کہ جن لوگوں نے اپنا آدھار کارڈ نہیں بنایا ہے، عنقریب مدینہ ویلفئر سوسائٹی دفتر میں آدھار کارڈ بنوانے کا کام بھی شروع کیا جائے گا۔

افتتاحی تقریب میں مدینہ ویلفئیر سوسائٹی کے ذمہ داران بالخصوص پروفیسر ہاشم زرزری، ڈاکٹر عارف محتشم و دیگر کافی لوگ بھی موجود تھے۔