بی جے پی کمیونسٹوں کو سبق سکھانا جانتی ہے؛ کیرالہ میں ایم پی نلین کمار کٹیل کا خطاب
کوٹایم 18/جنوری (ایس او نیوز) کچھ دنوں پہلے منگلورو میں احتجاجی مظاہرے کے دوران ہندتوا کارکن کے قتل میں ملوث ملزموں کو گرفتار نہ کئے جانے کی صورت میں جنوبی کینر ضلع کو آگ لگادینے جیسا متنازعہ اوربھڑکاؤ بھاشن دے کر سرخیوں میں رہنے والے رکن پارلیمان نلین کمار کٹیل نے اب کیرالہ میں ایک میٹنگ کے دوران کمیونسٹوں کو دھمکی دی ہے کہ بی جے پی کیرالہ میں اپنی طاقت کا مظاہرہ کرسکتی ہے اورکمیونسٹوں کوکیرالہ سمیت ملک کے دیگر حصوں میں سبق سکھاسکتی ہے۔
ذرائع سے ملنے والی اطلاع کے مطابق منگلورو کے ایم پی مسٹر نلین کمار کٹیل کیرالہ میں بی جے پی کارکنان اور لیڈران پر کمیونسٹ پارٹی آف انڈیا مارکسسٹ (سی پی آئی ایم)کے کارکنان کی طرف سے جاری تشدد اور قاتلانہ حملوں کا جائزہ لینے کے لئے منعقدہ میٹنگ میں خطاب کررہے تھے۔کٹیل نے یہ اعلان بھی کیا کہ اگر بی جے پی کارکنان پر حملے نہیں رکے تو پھر مرکزی حکومت کیرالہ میں مداخلت کرسکتی ہے۔ اگر سی پی آئی(ایم) برسراقتدار رہتے ہوئے کیرالہ میں تشدد نہیں رکا تو پھر ملک کے دوسرے سی پی آئی (ایم) کو ملک کی دوسری ریاستوں میں بی جے پی کی طاقت کامظاہرہ دیکھنا پڑے گا۔مسٹر کٹیل نے کہا کہ کیرالہ میں سی پی آئی (ایم) کے دور میں تشدداورسیاسی قتل بڑھتا جارہا ہے جبکہ ملک کی دیگر ریاستیں معاشی ترقی کی طرف گامزن ہیں۔
