بیجو جنتا دل کے سینئر لیڈر اور لوک سبھا رکن لڈو کشور سوین کا انتقال
بھونیشور:6 /فروری (ایس اونیوز /آئی این ایس انڈیا) بیجو جنتا دل کے سینئر لیڈر اور لوک سبھا رکن لڈو کشور سوین کا طویل علالت کے بعد یہاں ایک نجی ہسپتال میں انتقال ہو گیا،وہ71سال کے تھے،خاندانی ذرائع نے یہ معلومات دی ہیں۔سوین کے خاندان میں بیوی، دو بیٹے اور ایک بیٹی ہیں۔ذرائع نے بتایا کہ اڑیسہ کے اسکا لوک سبھا حلقہ کی نمائندگی کرنے والے بی جے ڈی لیڈر گردے کی بیماری میں مبتلا تھے،منگل کی رات ان کا انتقال ہو گیا۔وزیر اعظم نریندر مودی، اڑیسہ کے وزیراعلیٰ نوین پٹنائک اور بہت سے دوسرے رہنماؤں نے سوین کی موت پر غم کا اظہار کیا ہے۔وزیر اعظم نے ایک ٹویٹ میں کہا کہ اڑیسہ کے اسکا سے لوک سبھا رکن لڈو کشور سوین جی کے انتقال سے دکھی ہوں،معاشرے کے تئیں ان کی قیمتی شراکت کے لئے انہیں ہمیشہ یاد رکھا جائے گا۔مودی نے کہا کہ دیہی ترقی کے میدان میں ان کا کام قابل ذکر ہے،ان کے بیٹے نچکیتا سے بات کرکے تعزیت کا اظہار کیا۔پٹنائک نے اپنے تعزیتی پیغام میں سوین کو ایک قابل لیڈر بتایا ہے جو ریاست اسمبلی کے رکن بھی رہ چکے ہیں۔اڑیسہ اسمبلی نے سوین کے انتقال پر افسوس کا اظہار کیا اور کچھ لمحے کی خاموشی رکھ کر انہیں خراج عقیدت پیش کیا۔سوین 2014میں اسکا لوک سبھا حلقہ سے بی جے ڈی امیدوار کے طور پر لوک سبھاکے لیے منتخب ہوئے تھے۔اس سے پہلے، وہ 2004میں گنجام ضلع کے کبیسریا شہر اسمبلی حلقہ سے بی جے ڈی کے ٹکٹ پر اسمبلی کے لیے منتخب ہوئے تھے۔