بھٹکل:22/ مارچ (ایس اؤنیوز)ضلع انتظامیہ ، ضلع پنچایت اترکنڑا، بھٹکل تعلقہ انتظامیہ ، تعلقہ پنچایت بھٹکل ، محکمہ اطفال بھٹکل کے اشتراک سے بروز منگل کو شہر میں اپاہج ووٹروں میں بیداری پیدا کرنے کے لئے خصوصی بیداری جاتھا کا اہتمام کیاگیا ۔
بھٹکل کے اسسٹنٹ کمشنر منجوناتھ نے شمس الدین سرکل پر بیداری جاتھا کو ہری جھنڈی دکھائی ۔ سہ پہیہ سواریوں کے ذریعے نکلی اپاہجوں کی ریلی گرو سدھیندرا کالج پہنچ کر اختتام پذیر ہوئی ۔ اس کے بعدسڑک ناٹک کی نمائش کی گئی ۔اپاہجوں کے لئے کالج کمروں میں نظم ، رنگولی ، مصوری جیسے مختلف مقابلہ جات کا اہتمام کیاگیا جس میں کئی اپاہج بڑے شوق سے شریک ہونےکی اطلاع دی گئی ہے۔ تعلقہ پنچایت آفیسر سی ٹی نائک، بی ای اؤ ایم آر منجی ، تعلیمی وسائل افسر یلما، بھٹکل محکمہ اطفال کی افسر سوشیلا ، صحت عامہ کے افسر ایریا دیواڑیگا وغیرہ موجود تھے۔