بھٹکل:20/ستمبر (ایس اؤنیوز) بلدیہ دکانوں کی نیلامی میں اپنے ساتھ ہوئی نا انصافی کو لے کر احتجاج کرتے ہوئے خودکشی کے ذریعے ہلاک ہونے والے  رام چندرنائک کے خاندان کو زائد معائوضہ ادا کرنے کا مطالبہ کرتے ہوئے آج بدھ کو نامدھاری ابھیرودھی سنگھا نے اسسٹنٹ کمشنر کو میمورنڈم  پیش کیا ۔ جس میں بتایا گیا ہے کہ  رام چندر نائک بے حدغریب خاندان سے تعلق رکھتا تھا، بلدیہ کامپلکس میں ایک چھوٹی سی دکان کے ذریعے تھوڑا بہت کماکر اپنی ماں کے ساتھ زندگی گزار رہاتھا۔ اس کی اچانک موت سے ان کا خاندان سڑک پر آگیا ہے ، لہٰذا زندگی کے گزارے کے لئے حکومت زیادہ سے زیادہ معاوضہ منظور کرے۔

نامدھاری سنگھا نے اسسٹنٹ کمشنر کو ایک اور میمورنڈم پیش کرتے ہوئے میونسپالٹی عمارت میں  پتھرائو کے تعلق سے ہوئی گرفتاریوں کی بھی مذمت کی ہے۔ میمورنڈم میں بتایا گیا ہے کہ رام چندر نائک کی خودکشی کی اطلاع پاتے ہی مشتعل ہجوم نے  عمارت پر پتھراؤ کیا تھا ، مگر پولس نے اس چھوٹے سے واقعے کو بڑا کرکے نوجوانوں کو نشانہ بنا کر ڈکیتی  اور لوٹ مار کے مقدمات کو درج کیا ہے، جو  قابل مذمت ہے۔

میمورنڈم میں یہ بھی کہا گیا ہے کہ رات رات بھرپولس گھروں میں گھس کر جس طرح کا رویہ اپنا رہی ہے وہ غلط ہے۔  میمورنڈم میں نامدھاری سما ج کے نوجوانوں پر درج کئے گئے ڈکیتی جیسے معاملات کو رد کرنے کا مطالبہ کیا گیا ہے اور اس تعلق سے کیس واپس نہ لینے کی صورت میں سخت احتجاج کا انتباہ دیا گیا ہے۔ اس موقع پر بھٹکل نامدھاری سنگھا کے صدر ایم آر نائک، اعزازی صدر ڈی بی نائک، جے این نائک ایس ایم نائک، کے آر نائک، ستیش نائک، گنپتی نائک، موہن نائک سرپن کٹاوغیرہ موجود تھے۔