بھٹکل رکن اسمبلی کے ہاتھوں مٹھلی پنچایت دفتر کی نئی عمارت کا افتتاح :منکال وئیدیا نے کہا، میں اپنے کاموں کا حساب اور ریکارڈ دینے تیار ہوں
بھٹکل:24/ فروری (ایس اؤنیوز)جس عوام نے مجھے عوامی نمائندےکی حیثیت سے بطور رکن اسمبلی منتخب کیا ہے، میں نے ان کا احسان ادا کرنے کے لئے بساط بھر کوشش کی ہے، مگر حکومت کی طرف سے سرکاری امداد فراہم کئے جانے کے متعلق مخالفین کے باربار الزام تراشی سے میں تنگ آگیا ہوں۔ اگر کوئی مجھ سے میرے کام کے تعلق سے جاننا چاہتے ہوں تو میں مجھ سے آکر پوچھ لیں، میں اپنے کام کا ریکارڈ دینے کے لئے تیار ہوں، یہ بات رکن اسمبلی منکال وئیدیا نے کہی۔
وہ یہاں سنیچر کو تعلقہ کے مٹھلی میں نوتعمیر شدہ پنچایت دفتر کا افتتاح کرنےکے بعد خطاب کررہے تھے۔ میرا ایمان ہے کہ تعلیم سے ہی ترقی ہوتی ہے، میں نے اپنی مدت میں سب سے زیادہ ترجیح تعلیمی میدان کو دیا ہے۔ انہوں نے دعویٰ کیا کہ بغیر کسی خصوصی منصوبے کے 7000سے زائد گھروں کو انہوں نے بجلی کی سہولیات بہم پہنچائی ہیں، گنگاکلیان منصوبے کے تحت گذشتہ 22سالوں میں 75مستفیدین کو منتخب کیا گیا تھا، لیکن میری پانچ سالہ مدت میں 200سے زائد مستفیدین نے استفادہ کیا ہے۔ 100سے زائد اپاہجوں کو سواریاں فراہم کی ہیں اور بقول منکال وئیدیا، ریاستی حکومت کے اجول منصوبے کے تحت بھٹکل کے ہزاروں لوگوں کو فائدہ ہوا ہے۔
ضلع پنچایت صدر جئے شری موگیر، ممبر البرٹ ، سندھو بھاسکرنائک، گرام پنچایت صڈر امینا، تعلقہ پنچایت نائب صدر رادھا اشوک وئیدیا، اسٹانڈنگ کمیٹی چیرمن میناکشی جٹپا نائک، ممبران جئے لکشمی گونڈ، وشنو دیواڑیگا، مہابلیشورنائک، پنچایت ممبر گنپتی نائک،چندرہاس نائک وغیرہ موجود تھے۔ پنچایت ترقی جات افسر راجیشوری نے استقبال کیا تو استاد شریش آچاریہ نے نظامت کی۔