بھٹکل یکم جون (ایس او نیوز) بھٹکل کے نو منتخب رکن اسمبلی  سُنیل نائک نے آج جمعہ کو اچانک سرکاری اسپتال کا دورہ کرتے ہوئے ڈاکٹروں اور اسپتال کے اسٹاف کو حیران کردیا۔  اسپتال پہنچ کر انچارج ڈاکٹر دیناکر سے ملاقات کرتے ہوئے تمام صورتحال پر تبادلہ خیال کیا، اسپتال میں صاف صفائی نہ ہونے کو لے کر انہوں نے اسٹاف کو آڑے ہاتھ لیتے ہوئے ٹوائلٹ میں صاف صفائی نہ ہونے کو لے کر بھی ناراضگی ظاہر کی۔ 

بتایا گیا ہے کہ جمعرات کی دیر شب کسی نے رکن اسمبلی کو خبر کی تھی کہ حادثے میں زخمی مریض کو دیکھنے کے لئے  اسپتال میں ڈیوٹی ڈاکٹر غیر حاضر ہے۔ اسی شکایت پر کاروائی کرتے ہوئے ایم ایل اے نے آج اچانک دورہ کیا تھا۔ 

ایم ایل اے نے رات کو ڈیوٹی دینے والے ڈاکٹر کو غیر حاضر ہونے اور کافی تاخیرسے اسپتال پہنچنے  پر اُن کی خوب  خبر لی اور انچارج ڈاکٹر سے اس تعلق سے اگلی کاروائی کے متعلق  تبادلہ خیال کیا۔

مریضوں کے رشتہ داروں نے ایم ایل اے کو بتایا  کہ  اسپتال میں چلڈرن کا ماہر ڈاکٹر نہیں ہے، ہڈیوں کا ڈاکٹر اکثر ڈیوٹی سے غیر حاضر رہتا ہے، ڈیالوسس سینٹر میں نئے مریضوں کی بھرتی نہیں کی جارہی ہے۔ پہلے روٹری کلب کے ذریعے ڈیالوسس سنٹر چلایاجارہا تھااب سرکاری اسپتال کے ذریعے بی آر ایس کمپنی کو  کام سونپا گیا ہے اور جن مریضوں کو روٹری کلب کے ذریعے  ڈیالوسس کیاجارہا تھا، اُن ہی مریضوں کا  ڈیالوسس کیاجاتا ہے۔

 ایم ایل نے ہوناور کے چلڈرن اسپیشلسٹ کو عارضی طور پر بھٹکل میں بھی اپنی خدمات فراہم کرنے  فون کے ذریعے ہدایت دی۔ ڈیالوسس سینٹر کے تعلق سے  اسپتال کے ذمہ داران نے بتایا کہ یہاں صرف دو مشینیں  ہیں، ایک مشین پر ڈیالوسس کرنے پر چار گھنٹے صرف ہوتے ہیں، اس مناسبت سے ہر روز چھ مریضوں کا ہی علاج ممکن ہے۔  فوری کاروائی کرتے ہوئے سنیل نائک نے بی آر ایس کمپنی کے ذمہ داران سے فون پر بات چیت کی اور اُنہیں ہدایت دی کہ بھٹکل اسپتال میں ایک اور ڈیالوسس مشین نصب کرے اورنئے مریضوں کا بھی ڈیالوسس کرے۔

جب اُنہیں بتایا گیا کہ اسپتال میں کوئی سیکوریٹی اہلکار نہیں ہے، راتوں کے اوقات میں اسپتال میں مریضوں کو بھرتی کرنے میں دشواری ہوتی ہے، ریسپشن پر صرف دن کے اوقات میں لیڈی اسٹاف موجود رہتی ہے، بعد میں وہاں کوئی نہیں رہتا اس لئے بہت سارے مسائل ہیں، اسی طرح بھٹکل اسپتال میں ابھی تک آئی سی یو کی سہولیات فراہم نہیں کی گئی ہے، حالانکہ کمٹہ اور دیگر تعلقہ جات میں آئی سی یو کی شروعات ہوچکی ہے اس تعلق سے  انچارج ڈاکٹر نے  بتایا کہ  اسپتال میں جملہ 64 اسٹاف کی ضرورت ہے، مگر صرف 20 اسٹاف کی مدد سے اسپتال کو چلایاجارہا ہے۔

اخبارنویسوں سے گفتگو کرتے ہوئے نوجوان ایم ایل اے سُنیل نائک نے پرعزم لہجے میں بتایا کہ وہ اس سرکاری اسپتال کو ضلع بھر کا  بہترین اسپتال بنائیں گے اور یہاں ہر طرح کی سہولیات فراہم کرتے ہوئے اسے  ہائی ٹیک اسپتال میں منتقل کریں گے۔ انہوں نے کہا کہ اسپتال کے ایمرجنسی وارڈ کو اب نئی عمارت میں منتقل کرنے کی ہدایت دی ہے۔  صفائی ستھرائی  پر پوری توجہ دی جائے گی۔ ڈاکٹروں کی لاپرواہی کو آئندہ برداشت نہیں کیا جائے گا اور اس اسپتال کو اس قابل بنایا جائے گا کہ عام عوام اس سے بھرپور فائدہ اُٹھاسکیں اور بالخصوص حادثوں کے موقع پر مریضوں کو اسی اسپتال میں علاج کی سہولت ہو۔

اس موقع پر بی جے پی صدر راجیش نائک سمیت بی جےپی کے کافی ممبران موجود تھے۔ اسپتال میں انچارج ڈاکٹر کے ساتھ ساتھ دیگر ڈاکٹرس بھی موجود تھے۔