بھٹکل:2/ اگست (موصولہ رپورٹ/ایس اؤ نیوز) مرحوم عبداللہ دامودی کی رحلت پرادارہ تربیت اخوان بھٹکل کی جانب سے بروز جمعرات کو پر شمش انگلش میڈیم اسکول میں انتظامیہ ، اساتذہ اور طلبا و طالبات کے ساتھ تعزیتی نشست کا انعقاد ہوا۔
ناظم ادارہ عبدالقادر باشاہ رکن الدین نے مرحوم عبداللہ دامودی کو ان گنت خوبیوں کے مالک قرار دیتے ہوئے کہاکہ بھٹکل کے اطراف واکناف کی جماعتوں میں مرحوم کافی مقبول تھے، تنظیم کے سلسلے میں دورے کرتے رہتے تھے۔ ناظم ادارہ نے کہاکہ مرحوم نوجوانوں کی تربیت پر خاص توجہ دیتے تھے جس کی میں بھی ایک مثال ہوں۔ میری تربیت میں بھی ان کا حصہ ہے ، آج میرے پاس اظہار بیان کا جو ملکہ ہے وہ مرحوم کی محنت کا نتیجہ ہے ، انجمن میں میری پیش کردہ سب سے پہلے تقریر بعنوان ’سائنس نے دنیا کو آباد کیا یا بربادکیا‘ انہی کی لکھی ہوئی تھی اور جس پر مجھے انعام بھی ملا تھا۔ آپ نے ان کی مختلف خوبیوں کا ذکر کرتے ہوئے شعر کے ذریعےدعائے مغفرت کی کہ
آپ کی رحلت یقیناً باعث حزن وملال بخش دے اس مرد حق کو ائے خدائے ذوالجلال
اس کے بعد ڈاکٹر اویس خواجہ نے اپنے تعلقات کے بارے میں بتا تے ہوئے کہاکہ بچپن میں جو تعلقات قائم ہوئے تھے وہ آج بھی اسی طرح قائم تھے۔ مرحوم کا تعلق بھٹکل کے امیر گھرانے سے تھا آپ کے نانا عدن میں کاروبار کرتے تھے اور وہاں ان کی جائیدادبھی تھی لیکن ایک دور ایسا بھی آیا کہ معاشی مشکلات کا سامنا کرنا پڑا آپ نے بتایا کہ آپ غریب پرور تھے ضرورتمندوں کا خیال رکھتے خدمت خلق کاکام بہت خاموشی سےانجام دیا کرتے تھے اس کے بعد آپ کے ایک اور ساتھی عبداللہ رفیق نے بھی اپنی رفاقت کا ذکر کیا کہ کس طرح بمبی میں ان کا ساتھ رہااور جماعت اسلامی سے ان کے تعلقات پر روشنی ڈالی۔ سکریٹری شمش اسکول محمد طلحہ سدی باپا ابتداء میں اظہار خیال کرتے ہوئے ان کی تعلیمی فکر اور تعلیمی رہنمائی کو بیان کیا۔ سید محمد زبیر مارکیٹ نے مرحوم کو سراپا تحریک کے مماثل قرار دیتے ہوئے ریلیف کے کاموں میں بڑھ چڑھ کر حصہ لینےکا ذکر کیا۔ جب کہ اسکول کے استاڈ محمد رضا مانوی نے انھیں نوائطی زبان کی انسا ئیکلو پیڈیا کہا ۔مولانا عزیز الرحمان ندوی کی دعا پر اجلاس کی کارروائی اختتام کو پہنچی۔
خیال رہے کہ جناب عبداللہ دامودی کی رحلت کی خبر ملتے ہی شمش انگلش میڈیم اسکول کو فوری چھٹی دی گئی اور طلباء و طالبات نے اسکول میں ایک ڈیڑھ گھنٹہ وقفہ کے دوران قرآن خوانی کی اور مرحوم عبداللہ دامودی کے لئے دعائے مغفرت کی۔