بھٹکل یکم فروری (ایس او نیوز)  بھٹکل جامعہ اسلامیہ میں کل جنوبی ہند مسابقہ بین المدارس، اسکولس و کالجس کا شاندار انعقاد ہوا، جس میں جنوبی ہندوستان کی آٹھ ریاستوں کے 85 مدارس  نیز اسکول و کالجس سے 240 طلبا نے حصہ لیا اور اپنی خداداد صلاحیتوں کے جوہر دکھلاتے ہوئے  انعامات بھی حاصل کئے اور پروگرام کو بھی کامیاب بنایا۔

اللجنۃ العربیۃ کے زیراہتمام دوروزہ مسابقہ مورخہ 30 جنوری کوشروع ہوکر اگلے روز 31/ جنوری کو اختتام کو پہنچا۔حفظ، ناظرہ قران، کوئیز،  مکالمے،  اسلامی ترانے وغیرہ پر طلبہ کے درمیان دلچسپ مقابلے ہوئے اور حاضرین کو بھی ان پروگراموں سے لطف اُٹھانے اور اپنی معلومات میں اضافہ کرنے کا سنہرا موقع ملا۔

پروگرام کا آغاز عزیزم سیدنبیغ ابن سید نورالہدی برماور کی خوش الحان تلاوت سے ہوا،  سید احمد اثال نے خوش گلو آواز میں دربار رسالت میں گلہائے عقیدت پیش کیے۔ مہمانوں کے لیے استقبالیہ علی تبیان آرمار نے بہترین انداز میں پیش کیا۔اس کے بعد اللجنۃ العربیۃ کے جنرل سکریٹری محمد عمیر کولا نے لجنہ کا تعارف پیش  کرتے ہوئے اس کے قیام کا مقصد اور اس کے شعبہ جات کو عوام کے روبرو رکھا،  دانش شنگیٹی،  خضر حاجی فقیہ اور اظہار الحق بیہاٹی نے لجنہ کا خوبصورت ترانہ  پیش کیا۔

مشرف اللجنۃ العربیۃ استاد جامعہ مولانا عبدالعلیم  خطیب ندوی نے فرمایا کہ مدرسہ کا مقصد  ملت کے لیے ایسے علماء، فقہاء، دانشور اور قائدین کو پیدا کرنا ہے جن کے ذریعہ ملت کو صحیح رہبر مل جائے، اچھے اخلاق سے آراستہ کرتے ہوئے اسلامی تربیت کے سانچے میں ان کو ڈھالنا، اور مدارس کے باہر عوام الناس کو دین اور دینی تہذیب سے قریب کرنا اور ہر موڑ پر ان کی رہنمائی کرنا ہے، جس کے لیے  مدرسہ ہر وقت کوشاں رہتا ہے۔ مولانا نے جلسہ کی غرض و غایت بیان کرتے ہوئے  فرمایا کہ آج میڈیا کے ذریعہ لوگوں کی فکروں اور عقلوں پر حملے کیے جارہے ہیں، عوام میں اختلافی مسائل کو چھیڑ کر دین کے سلسلہ میں شکوک و شبہات پیدا کیے جارہے ہیں،  زمانہ کے چیلنجوں کا مقابلہ کرنے اور زمانے کی آنکھ سے آنکھ ملاکر  گفتگو کرنے کی صلاحیتوں کو پیدا کرنے کے لیے لجنہ کی طرف سے مختلف ثقافتی پروگرام منعقد ہوتے ہیں جس کی ایک کڑی یہ جلسہ ہے، جس کے ذریعے  طلبہ کے اندر خود اعتمادی اور عملی میدان میں جمنے اور ڈٹے رہنے کی صفت پیدا کرنا ہے۔

مہتمم جامعہ مولانا مقبول احمد  کوبٹے ندوی نے  حاضرین کا پرتپاک استقبال کرتے ہوئے کلمات تشکر بھی پیش کیا، اس موقع پر مولانا نے  طلبا کو کئی نصیحتوں سے نوازتے ہوئے قاری طیب صاحبؒ کی وہ بات یاد دلائی کہ مدرسہ اینٹ گارے کا نام نہیں، بلڈنگ وعمارت کا نام نہیں، مدرسہ پڑھنے پڑھانے کا، تعلیم و تعلّم کا، اخلاق نبویہ کو  لوگوں کے اندر پیدا کرنے کا نام ہے، نیز مفکر اسلام کے قول کو بھی یاد دلایا کہ مدرسہ عروۃ الوثقٰی ہے جس کو پکڑ کر اللہ تک پہنچنے کی اور لوگوں کو اللہ تک پہنچانے کی فکریں کرنا ہے۔

صدر جامعہ اور قاضی جماعت المسلمین بھٹکل مولانا محمد اقبال ملا ندوی کی دعا پر افتتاحی نشست کا اختتام ہوا، جس کے بعد مسابقہ حفظ و ناظرہ، اسلامی ترانے اور مکالموں کا سلسلہ شروع ہوا۔ مسابقہ میں کرناٹکا ، مہاراشٹرا، گجرات، گوا، تمل ناڈو، تلنگانہ، آندھرا پردیش اور کیرالہ کے جملہ 85 اسکولس، کالجس و مدارس کے طلبا نے حصہ لیا۔

زمرہ 1 کے مکالمہ مقابلے میں اول اور سوم  انعام جامعہ اسلامیہ بھٹکل نے حاصل کیا، جبکہ جامعہ مظہر سعادت  ہانسوٹ (گجرات)  نے دوم انعام حاصل کیا۔ زمرہ نمبر 3 : حزب اول سورہ ضحی تا سورہ ناس مقابلے میں  اول انعام : عبد القیوم ( البشیر اننٹر نشنل اسکول بنگلور) ،  دوم انعام : احمد ( علی پبلک اسکول چپلون )  اور شمویل بن عبد الرزاق ( توحید اسکول گنگولی) کے نام رہا، جبکہ سوم انعام : محمد شاد ( علی پبلک اسکول ٹمکور)  ،  محمد عاطر ( اسامہ اردو پرائمری اسکول شکاری پور ، نجیب الرحمن ( زبیدہ انگلش پرائمری اسکول شکاری پور اور حماد اسلم پٹیل ( انجمن خیر الاسلام مہابلیشور ) نے حاصل کیا۔حزب ثانی : سورہ اعلی تا سورہ ناس کے مسابقوں میں عمیر بن عبد الباسط حافظ ( علی پبلک اسکول بھٹکل) نے اول انعام،  عبدالاحد (اقرا عربک اسکول، مینگلور) نے دوم اور   محمد صادق فرحان ( ویسڈم پبلک اسکول بینگلور )  نے سوم انعام حاصل کیا۔

زمرہ نمبر 4 : ناظرہ قرآن  میں اول انعام : محمد یوسف بن زکریا کڑپاڑی ( الہلال انگلش اسکول منکی ) ، دوم انعام : ذبیح اللہ ابن عبد الحمید بڈو (سرکاری اردو پرائمری اسکول جامعہ آباد بھٹکل )  اور سوم انعام : عبد اللہ ابن عبد الوارث ( نونہال سینٹرل اسکول بھٹکل ) کے نام رہا۔

زمرہ نمبر 5 : اسلامی ترانے میں اول انعام : مکتب جامعہ اسلامیہ کارگیدے بھٹکل، دوم انعام : مکتب جامعہ اسلامیہ نوائط کالونی بھٹکل اور سوم انعام : مدرسہ عربیہ تعلیم القرآن تینگنگنڈی بھٹکل نے حاصل کیا۔

اسلامی کوئیز مقابلوں میں بھٹکل انجمن کے طلبا کا پرفارمینس نہایت شاندار رہا ۔ انجمن آرٹس سائنس ، کامرس اینڈ پی جی سینٹر بھٹکل  ان مقابلوں میں اول نمبر کی حقدار قرار پائی تو انجمن انسٹی ٹیوٹ آف ٹیکنالوجی اینڈ مینجمنٹ بھٹکل اور انجمن پی یو کالج سکینڈ ائیر بھٹکل نے بالترتیب دوم اور سوم مقام حاصل کرنے میں کامیاب رہیں۔

دوروزہ پروگرام میں شہر کے عمائدین قوم سمیت عوام الناس کی کافی بڑی تعداد شریک رہی۔