بھٹکل 7؍اکتوبر(ایس او نیوز)محکمہ جنگلات کی طرف سے بھٹکل میں63ویں 'وائلڈ لائف ویک' یاجنگلاتی زندگی ہفتے کا آغازاسکولی طلبہ کی ریالی سے ہوا جس میں ودیا بھارتی، نیو انگلش اسکول اور سونارکیری سرکاری اسکول کے طلبہ نے حصہ لیا۔بھٹکل رینج فاریسٹ آفس کے پاس اسسٹنٹ کنزرویٹر آف فاریسٹ بالچندرا ایچ سی نے ربن کاٹتے ہوئے ریالی کا افتتاح کیا۔
طلبہ کا جلوس شمس الدین سرکل اور بس اسٹانڈسے گزرتا ہوا تیمکّا گارڈن تک پہنچا۔جہاں جنگلاتی زندگی کے ہفتے کے سلسلے میں منعقدہ کوئز، پینٹنگ اور تقریری مقابلوں میں جیت حاصل کرنے والے طلبہ کو انعامات سے نوازا گیا۔
پروگرام کا افتتاح بھٹکل جے ایم ایف سی سینئر سول جج راگھویندرا ڈی نے کیا تھا ۔ جلسے کی صدارت ہوناور رینج کے ڈی سی ایف وسنت ریڈی نے کی۔ مہمان خصوصی کے طور پر بھٹکل جے ایم ایف سی چیف سول جج آر کلکرنی، ایڈیشنل سول جج ناگیندرا شریک اجلاس رہے۔اس موقع پر طلبہ کی بڑی تعداد کے علاوہ محکمہ جنگلات کے افسران اور اہلکار حاضر تھے۔