بھٹکل انجمن حامئی مسلمین کے بے لوث خادم ، خاموش سپاہی ، سابق سکریٹری محسن کھروری انتقال کرگئے
بھٹکل: 3؍نومبر (ایس او نیوز)انجمن حامئی مسلمین بھٹکل کے بے لوث خادم، منکسر المزاج ، متحرک رکن ، سابق سکریٹری محسن کھروری (59) کا سنیچر کی رات مدینہ کالونی کے ان کےمکان میں دل کا دورہ پڑنے سے انتقال ہوا۔انا للہ وانا الیہ راجعون۔
محسن کھروری پچھلے کئی دہوں سے انجمن سے جڑ کر تعلیمی خدمات میں مصروف عمل تھے۔ وہ فی الحال انجمن ایگزکیٹیو کمیٹی کےرکن، صدسالہ جشن کمیٹی کے رکن، انجمن دستور ترمیم کمیٹی کے رکن کے طورپر میدان عمل میں تھے۔ اس سے قبل مختلف عہدوں پر فائز رہتے ہوئے اپنی خدمات انجام دی تھیں۔ سابق میں انجمن ڈگری کالج اینڈ پی جی سنٹر اور انجمن پی یوکالج کے سکریٹری کے طورپر بھی انہوں نے خدمات انجام دی تھیں۔
ان کے انتقال پر انجمن کے عہدیداران ، ممبران سمیت انجمن سے وابستہ بے شمار اساتذ ہ کرام نے انہیں خراج عقیدت پیش کرتے ہوئے ایک با اخلاق، خاموش مزاج، مخلص انسان قرار دیتے ہوئے ان کی مغفرت اور جنت الفردوس میں ا علیٰ درجات کے لئے دعا کی ہیں۔ مرحوم کےپسماندگان میں ایک بیٹا اور ایک بیٹی ، بیوی سمیت کئی رشتہ دارہیں۔
نوائط کالونی کی تنظیم جامعہ مسجد میں نماز جنازہ ادا کرنےکے بعد قریب کے قبرستان میں ان کی تدفین عمل میں آئی ۔ اس وقت ہزاروں لوگ شریک تھے۔ مرحوم محسن کھروری کی رحلت پر انجمن حامئی مسلمین بھٹکل کے صدر، جنرل سکریٹری ، ایڈیشنل سکریٹری ، دیگر عہدیداران، مجلس اصلاح وتنظیم کےعہدیداران سمیت کئی ایک ذمہ داران نے گہرے رنج کا اظہار کرتے ہوئے مغفرت کی دعا کی ہے۔