آوڈیو ٹیپ معاملہ؛ ایڈی یورپا نے مانی رکن اسمبلی کے بیٹے سے ملاقات کی بات۔ کمار سوامی پر لگایا تیسرے درجے کی سیاست کا الزام
ہبلی10؍فروری (ایس او نیوز) کرناٹکا کے وزیر اعلیٰ کمارا سوامی نے ’آپریشن کنول‘کے تحت سابق وزیراعلیٰ ایڈی یورپا کے ذریعے جے ڈی ایس رکن اسمبلی کوخریدنے اور بی جے پی میں شامل کرنے کی پیش کش کا جو آڈیو کلپ جاری کیا تھا اس تعلق سے اب ایڈی یورپا نے قبول کیا ہے کہ انہوں نے گورمیت کل کے ایم ایل اے ناگنڈگوڈا کنڈکور کے بیٹے سے ملاقات کی تھی۔ خیال رہے کہ اس سے قبل ایڈی یورپا نے ا س آڈیو کلپ کو بالکل جھوٹ اور نقلی قرار دیا تھا۔
ایڈی یورپانے ہبلی ہوائی اڈے پر اخباری نمائندوں سے بات چیت کرتے ہوئے کہا کہ یہ سچ ہے کہ’’ رکن اسمبلی کے بیٹے شنکراگوڈا سے میں نے ملاقات کی تھی۔‘‘پھر کمار سوامی پر الزام لگاتے ہوئے کہاکہ’’ وہ تیسرے درجے کی گھٹیا سیاست کرنے پر اتر آئے ہیں۔ کمار سوامی نے سازش کے تحت رکن اسمبلی کے بیٹے کو ان کے پاس بھیجا اور اپنے مطلب کی باتیں ریکارڈ کروالیں۔ اس میں کچھ باتیں پوشیدہ رکھ دی گئی ہیں اور اپنے مفاد والی گفتگو کو عام کردیا ہے۔‘‘
ایڈی یورپا نے اس سے پہلے پراجول ریونا کی جانب سے جنتادل ایس میں چل رہے ’سوٹ کیس کلچر‘ کی طرف اشارہ کرتے ہوئے کہا کہ ان کے پاس کماراسوامی نے جو ایم ایل سی سیٹ کے لئے رقم کا مطالبہ کیا تھا اس کی ویڈیو کلپ موجود ہے اور وہ سوموار کے دن اسے عام کرنے والے ہیں۔اس کے علاہ انہوں نے یہ بھی کہا کہ ان کی بات چیت والی جو آڈیو کلپ کمارا سوامی نے جاری کی ہے ، اس تعلق سے جس قسم کی بھی تحقیقات ہونگی اس کا سامنا کرنے کے لئے وہ تیار ہیں۔