16 دن بعد 1 پیسہ سستا ہوا پٹرول ڈیزل؛ کیا حکومت عوام کا مذاق اُڑارہی ہے ؟
نئی دہلی،30؍مئی ( ایس او نیوز؍آئی این ایس انڈیا )پٹرول اور ڈیزل کی قیمتوں میں بے تحاشہ اضافہ کے بعد عوام کی جانب سے بی جے پی حکومت کی ہر طرف کھینچائی شروع ہوئی تو لگ رہا تھا کہ حکومت پٹرول اور ڈیزل کی قیمتوں میں کمی کرتے ہوئے عوام کی تھوڑی بہت حمایت حاصل کرنے کی کوشش کرے گی، مگر حیرت انگیز طور پر حکومت نے پٹرول اور ڈیزل کی قیمتوں میں ایک پیسہ کمی کرکے عوام کو بہت کچھ سوچنے پر مجبور کردیا ہے۔
بتایا جارہا ہے کہ پٹرول ڈیزل کی قیمتوں میں 60 پیسوں کی کمی کی خبر بدھ کی صبح انڈین آئیل کارپوریشن کے ویب سائٹ پر چھپی تھی، مگر بعد میں آئیل کمپنی نے وضاحت کی کہ ویب سائٹ پر غلطی سے دہلی میں پٹرول 60 پیسے جبکہ ڈیزل 56 پیسے سستا دکھادیا تھا، جبکہ حقیقت میں یہ کمی صرف ایک پیسے کی ہوئی ہے ۔انڈین آئل کارپوریشن کے مطابق دہلی میں منگل کو پٹرول 78.43 روپے فی لیٹر مل رہا تھا وہیں آج یہ 78.42 روپے فی لیٹر ہے۔ ادھر ممبئی میں منگل کو اس کی قیمت 86.24 روپے فی لیٹر تھی جو آج 86.23 روپے فی لیٹر ہے۔ وہیں ڈیزل کی بات کریں تو دہلی میں 69.30 روپے فی لیٹر اور ممبئی میں 73.78 روپے فی لیٹر مل رہا ہے۔آئی او سی کے ایک سینئر افسر نے بتایا کہ یہ کمی صرف ایک پیسے کی تھی ، لیکن کچھ غلطی کی وجہ سے 25 مئی کے دام آج شائع ہوگئے ، جس کو بعد میں صحیح کرلیا گیا۔
خیال رہے کہ پٹرول اور ڈیزل کی قیمتوں میں لگاتار 16 دنوں سے جاری اضافہ کی وجہ سے لوگ کافی پریشان ہیں۔ ایسے میں ایک پیسہ کمی کرنے سے ملک کے عوام محسوس کررہے ہیں کہ ایسا کرکے حکومت نے عوام کا مذاق اُڑایا ہے۔