ممبئی17؍اکتوبر(ایس او نیوز؍ یواین آئی )ممبئی کے شمال مغربی علاقہ ملاڈ (مشرق) میں جھاڑیوں سے ایک ٹریول بیگ میں20 سالہ ماڈل کی لاش ملنے سے سنسنی پھیل گئی ہے ۔ ایک سوٹ کیس مائنڈ اسپیس کے نزدیک ملا ہے ۔پولیس نے دعویٰ کیا ہے کہ بیگ برآمد ہونے کے4 گھنٹہ میں بانگر نگر پولیس نے قتل کے ملزم ایک نوجوان طالب علم کو گرفتار کر لیا ہے ۔ ملزم کی شناخت مزمل سعید (20 سال) کے طور پر ہوئی ہے ۔پولیس نے بتایا کہ مہلوک کا نام مانسی دیکشت ہے جو پیشہ سے ماڈل تھی۔پولیس کے مطابق ملزم مزمل سے پوچھ گچھ کے بعد انکشاف ہوا کہ واردات سے قبل مانسی مزمل کے فلیٹ میں تھی۔ اس کے بعد دونوں میں کسی بات کو لے کر تنازعہ ہوا، مزمل نے غصہ میں آکر مانسی کے سر پر اسٹول دے مارا جس سے اچانک مانسی کی موت واقع ہو گئی۔مانسی راجستھان کے کوٹہ سے تعلق رکھتی تھی اور گزشتہ6 مہینوں سے اندھیری (ایسٹ) میں رہ رہی تھی۔ پولیس نے بتایا کہ سعید اور مانسی کے درمیان دوستی ایک تیسرے دوست کے ذریعہ ہوئی تھی۔پولیس نے اطلاع ملنے پر سوٹ کیس برآمد کیا اور اسے کھولنے پر اندر سے ایک عورت کی لاش برآمد ہوئی، جس کے سر پر چوٹ کے نشان تھے ۔ لاش کو کْشن اور بیڈ شیٹ سے ڈھکا گیا تھا۔ اس کے بعد پولیس نے جانچ شروع کر دی۔ جانچ کے دوران پولیس کے ہاتھ ایک سی سی ٹی وی فوٹیج لگی جس میں ایک شخص کار کے اندر بیٹھے اور سڑک کے کنارے سوٹ کیس کو پھینکتے نظر آ رہا ہے ۔اسی بنیاد پر پولیس نے ملزم کی شناخت کی اور اسے اس کے فلیٹ سے گرفتار کر لیا۔ سعید کے خلاف آئی پی سی کی دفعہ 302 اور 201 کے تحت معاملہ درج کیا گیا ہے ۔