یونس قاضیا انجمن حامئی مسلمین بھٹکل کے نئے صدر منتخب؛ اسحاق شاہ بندری بنے جنرل سکریٹری
بھٹکل 10 مارچ (ایس او نیوز) انجمن حامئی مسلمین بھٹکل کے عہدیداران کی انتخابی میٹنگ آج بروز اتوار انجمن میٹنگ ہال میں منعقد ہوئی جس میں 35سال سے بھی زائد عرصہ سے انجمن کے رکن انتظامیہ جناب محمد یونس قاضیا صاحب صدر کے معزز عہدہ پر منتخب ہوگئے۔ جبکہ جنرل سکریٹری کے کلیدی عہدہ پر جناب اسحاق شاہ بندری کا انتخاب عمل میں آیا۔
دمام (سعودی عربیہ) کے معروف بزنس مین اور بھٹکل مسلم خلیج کونسل کے متحرک رکن سمیت کونسل میں کئی بار کلیدی عہدوں پر رہ کر قوم و ملت کی خدمات انجام دینے والے جناب یونس قاضیا پہلی مرتبہ قومی تعلیمی ادارہ انجمن میں صدر کے عہدہ پر منتخب ہوئے ہیں۔ موصوف کینرا مسلم خلیج کونسل میں بھی صدر کے عہدہ پر فائز ہیں۔ آپ سعودی عربیہ میں بھٹکل مسلم جماعت منطقۃ الشرقیہ کے اولین صدر بھی رہ چکے ہیں۔ جبکہ قومی سماجی ادارہ مجلس اصلاح و تنظیم سمیت دیگر اداروں میں بھی موصوف کافی متحرک ہیں۔
جنرل سکریٹری کے عہدہ پر جناب اسحاق شاہ بندری کا انتخاب عمل میں آیا۔ موصوف اس سے قبل ایڈیشنل جنرل سکریٹری کے طور پر خدمات انجام دے رہے تھے۔
الیکشن کمشنر جناب عبدالواجد کولا کی نگرانی میں ہوئے انجمن عہدیداران کے انتخابات میں 80 اراکین شریک رہے۔
جملہ منتخب عہدیداران کے نام اس طرح ہیں:
صدر: جناب محمد یونس قاضیاء
نائب صدر (اول) جناب محمد صادق پلّور
نائب صدر (دوم) ڈاکٹر زُبیر کولا
جنرل سکریٹری: جناب محمد اسحاق شاہ بندری
ایڈیشنل جنرل سکریٹری: ڈاکٹر آفتاب قمری
ورکس کمیٹی سکریٹری: جناب ایس جے سید ہاشم
فائنانس سکریٹری:جناب ایس ایم سید پرویز
AITM بورڈ سکریٹری: جناب محی الدین رکن الدین
BBA BCA پروفیشنل کالج بورڈ سکریٹری : جناب احید محتشم
پی یو اینڈ ڈگری کالج بورڈ سکریٹری: ڈاکٹر ایس ایم سید سلیم
ہائی اسکول بورڈ سکریٹری : جناب سعداللہ رکن الدین
پرائمری بورڈ سکریٹری: جناب تنویر کاسرکوڈ
دینیات بورڈ سکریٹری : مولانا ڈاکٹر عبدالحمید اطہررکن الدین ندوی