یادگیر میں بی جے پی کے یتنال نے چھوڑا پٹاخہ : ڈی کے شیوکمار کر رہے ہیں وزیر اعلیٰ سدارامیا کو ہٹانے کی سازش
یاد گیر، 4 / اکتوبر (ایس او نیوز) وقتاً فوقتاً بے سر و پا بیانات دینے والے بی جے پی لیڈر بسون گوڈا پاٹل یتنال نے یاد گیر کے شاہ پور میں ایک نیا شوشہ چھوڑتے ہوئے کہا ہے کہ موجودہ کانگریسی حکومت لوک سبھا انتخابات کے ساتھ گر جائے گی کیونکہ نائب وزیر اعلیٰ ڈی کے شیو کمار وزیر اعلیٰ سدارامیا کو ہٹانے کی سازش کر رہے ہیں ۔
یتنال نے کہا کہ میں نے بہت پہلے کہا تھا کہ یہ حکومت زیادہ دن نہیں چلے گی ۔ اب سی پی یوگیش نے کہا ہے ۔ یہ حکومت دسمبر تک گرنے والی ہے ۔ سدا رامیا کو وزارت اعلیٰ کی کرسی سے ہٹانے کے لئے ڈی کے شیوکمار نے سازش رچی ہے اور شامنور شیو شنکرپّا اور بی کے ہری پرساد کو بیانات دینے کے لئے اکسایا ہے ۔ یتنال نے کہا کہ کانگریس کے اندر خلفشار ہے ۔ بہت سارے اراکین اسمبلی کے اندر بے اطمینانی پائی جاتی ہے اس لئے یہ حکومت زیادہ دن نہیں چلے گی ۔