بنگلورو، 10؍جنوری (ایس او نیوز؍ایجنسی) بنگلورو میں ایک اندوہناک واقعہ پیش آیا ہے۔ بنگلورو کے آؤٹر رنگ روڈ میں زیر تعمیر میٹرو کا پلر منہدم ہو گیا جس کی وجہ سے ایک ہی کنبہ کے دو افراد ہلاک ہو گئے ہیں۔ مہلوکین میں ایک خاتون اور اس کا 2.5 سال کا بیٹا شامل ہے جس کی دردناک موت ہوئی ہے۔ پولیس کا اس واقعہ کے تعلق سے کہنا ہے کہ معاملہ صبح تقریباً 11 بجے کا ہے جب پلر کی تعمیر کے لیے لگایا گیا ٹی ایم ٹی سریا ان کے اسکوٹر پر گر گیا۔ کھمبے کی اونچائی 40 فیٹ سے زیادہ اور وزن کئی ٹن تھا۔

بتایا جاتا ہے کہ وہاں موجود لوگوں نے ماں اور بیٹے دونوں کو قریبی اسپتال میں داخل کرایا، لیکن انھیں بچایا نہیں جا سکا۔ پولیس کے مطابق انھوں نے معاملہ درج کر لیا ہے اور اس معاملے میں جلد جانچ شروع کی جائے گی۔ اس واقعہ کی وجہ سے کچھ دیر تک علاقہ میں ٹریفک جام کی حالت بھی پیدا ہو گئی تھی۔

اس دردناک حادثہ کے بعد کانگریس نے کرناٹک کی بی جے پی حکومت پر شدید حملہ کیا ہے۔ کرناٹک کانگریس صدر ڈی کے شیوکمار کا کہنا ہے کہ ’’بنگلورو میں میٹرو کا پلر منہدم ہو گیا۔ یہ ’40 فیصد کمیشن‘ والی حکومت کا نتیجہ ہے۔ ترقیاتی کاموں میں کوئی معیار نہیں ہے۔ لوگوں کا اس حکومت پر سے بھروسہ اٹھتا جا رہا ہے۔ ہر جگہ بدعنوانی دکھائی دے رہی ہے۔‘‘