کاروار: نیشنل ہائی وے66پر وائر لیس ٹیلی فون ٹاور کی سہولت۔ حادثات یا ٹریفک جام ہونے کی صورت میں فراہم ہوگی فوری راحت
کاروار 22/جون (ایس او نیوز) نیشنل ہائی وے 66فورلین توسیعی منصوبے کے تحت اب ہر دو کیلو میٹر کے فاصلے پر ایک وائرلیس ٹیلی فون ٹاور نصب کیا جارہا ہے، جس سے سڑک حادثہ پیش آنے یا پھر ٹریفک کے مسائل پیدا ہونے کی صورت میں ٹھیکے دار کمپنی آئی آر بی کے کنٹرول روم کو خبر دی جاسکے گی اور اس کے نتیجے میں فوری طور پر راحت فراہم کی جائے گی۔
آئی آربی کے ڈپٹی جنرل منیجر تیج سنگھ نے بتایا کہ دراصل فور لین تعمیری منصوبہ ختم ہونے کے بعد مزید 25برس تک اس ہائی وے کی دیکھ ریکھ آئی آر بی کمپنی ہی کی ذمہ داری ہوگی۔ اور اس قسم کی ٹیلی فون ٹاورس کی تنصیب ٹھکیداری کے معاہدے کا ایک حصہ ہے۔
کاروار ماجالی سے کنداپور تک تقریباً 200ٹیلی فون ٹاورس نصب کیے جائیں گے۔اس کے آلات فراہم کرنے کے لئے آئی آر بی نے یونائٹیڈ ٹیلی کام کو ذیلی ٹھیکہ (سب کانٹراکٹ) دیا ہے۔شمسی توانائی سے چلنے والے ان 8فٹ اونچے ٹاورس میں فون رابطے کے لئے ایریئلس لگے ہونگے،جبکہ ایک بچے کی بھی پہنچ والی اونچائی پر ٹیلی فون سیٹ لگا ہوگا۔ کوئی بھی حادثہ یا مسئلہ پیش آنے پرٹیلی فون باکس پر لگے لال بٹن کو دبانا ہوگا۔ کمپنی کے کنٹرول سے رابطہ قائم ہونے پر مسئلے کی نوعیت اور مقام کی تفصیل بتانی ہوگی۔پھر کنٹرول روم سے فوراً یہ خبرکمپنی کی طرف سے ہائی وے کی نگرانی پر مامور قریب ترین پٹرولنگ ویان کو دی جائے گی۔ اس طرح راحت اور امداد پہنچانے کے لئے کمپنی کے ذمہ دار بہت ہی کم وقت میں جائے وقوع پرپہنچ جائیں گے۔کنٹرول روم بیندور میں قائم کیاجائے گا مگر 5 تا6 پٹرولنگ ویان ہمیشہ سڑک پر گشت کرتی رہیں گی۔