لندن،14؍جولائی (ایس او نیوز؍ایجنسی) رومانیہ کی سیمونا ہالپ امریکا کی سرینا ولیمز کو اسٹریٹ سیٹس میں شکست دے کر ومبلڈن چیمپئن بن گئیں۔
سال کے تیسرے گرینڈ سلیم ٹینس ٹورنامنٹ کے ویمنز سنگلز فائنل میں رومانیہ کی سیمونا ہالپ اور امریکا کی سرینا ولیمز کا مقابلہ یکطرفہ ثابت ہوا، ہالپ نے اسٹریٹ سیٹس میں مضبوط حریف سرینا کو بآسانی شکست دیدی۔
سیمونا ہالپ کی جیت کا اسکور 2-6 اور 2-6 رہا، وہ سرینا ولیمز کو شکست دے کر پہلی بار ومبلڈن چیمپئن بنیں، ساتھ ہی انہوں نے ومبلڈن جیتنے والی رومانیہ کی پہلی کھلاڑی کا اعزاز بھی حاصل کرلیا۔
جیت کے بعد ہالپ کا کہنا تھا کہ سرینا ولیمز ہر کسی کیلئے متاثر کن ہیں، میچ سے قبل میں نے فیصلہ کیا تھا کہ اپنے کھیل پر توجہ مرکوز رکھوں گی، یہی وجہ ہے کہ میں اپنی بہترین پرفارمنس دینے میں کامیاب ہوئی۔
ہالپ کے کیریئر کا یہ دوسرا گرینڈ سلیم ٹائٹل ہے اس سے قبل وہ 2018ء میں فرنچ اوپن چیمپئن بنی تھیں، سرینا ولیمز کے شاندار کیریئر میں پہلی بار ہے کہ وہ مسلسل تیسرے گرینڈ سلیم فائنل میں ناکامی کا شکار ہوئی ہیں۔