اڈپی : "دُرگا دوڑ" جلوس میں کھلے عام تلواریں لہرانے کے خلاف کارروائی کا مطالبہ - ایس پی کو دیا گیا میمورنڈم
اڈپی 5 / اکتوبر (ایس او نیوز) شہر میں "دُرگا دوڑ" جلوس کے دوران کھلے عام تلواریں لہرانے کے علاوہ مسلمانوں کے خلاف اشتعال انگیز تقاریر کرنے والوں کے خلاف قانونی کارروائی کا مطالبہ کرتے ہوئے اے پی سی آر سمیت امن پسند اور ہمخیال تنظیموں کے ایک وفد نے ضلع سپرنٹنڈنٹ آف پولیس اکشئے مچیندرا کو میمورنڈم پیش کیا ۔
میمورنڈم میں کہا گیا ہے کہ " غیر قانونی طور پر تلواریں لہرانے کے ساتھ شری کانت شیٹی اور کاجل ہندوستانی نے اشتعال انگیز انداز میں خطاب کیا اور ہم اہنگی کو نقصان پہنچانے کی کوشش کی گئی ۔ یہ ایک منصوبہ بند حرکت تھی اور مقررین نے سماج کے ایک خاص فرقہ کے خلاف لوگوں کو جرائم پر اکسایا ۔"
اس وفد میں 'دلت دمنیتا ہوراٹا سمیتی' کے شامراج بیرتھی ، دلت سنگھرش سمیتی کے سندر ماسٹر، اے پی سی آر کے ضلع کنوینر حسین کوڈی بینگرے ، سنّی سمیوکت جماعت کے ضلع صدر ابوبکر نیجار، 'سہبالوے' کے صدر امرت شینوئی، کرسچین لیڈرس چارلس امبلر، ولیم مارٹس، سی پی آئی ایم لیڈر بال کرشنا شیٹی، سوشیل اکٹیویسٹ فنی راج ، 'سالیڈیاریٹی' کے افغان ہوڈے، منجوناتھ بالکدرو، مسلم وکّوٹا کے نائب صدر ادریس ہوڈے ، کانگریس لیڈر رمیش کنچن اور دیگر افراد موجود تھے ۔