ہوناور کے گیرسوپا ڈیم سے پھر چھوڑا گیا پانی؛ پانچ گھروں کو کیا گیا خالی؛ کھیتوں اور باغات میں پھر بھرگیا پانی
بھٹکل 8/ستمبر (ایس او نیوز) پڑوسی تعلقہ ہوناور کے گیر سوپا ڈیم سے پھر پانی چھوڑے جانے کے بعد شراوتی بیلٹ پر واقع دیہاتوں میں ندی کا پانی اُبل کر کھیتوں اور باغات سے ہوتا ہوا گھروں کے کمپاونڈوں کے اندر داخل ہوگیا ہے جس کی وجہ سے متعلقہ علاقوں میں رہنے والے عوام کو پھر ایک بار پریشانی کا سامنا کرنا پڑ رہاہے۔ اس بات کی اطلاع شراوتی کونسل کے سکریٹری جناب مظفر یوسف نے بذریعہ فون دی۔ انہوں نے سرکاری ذرائع کا حوالہ دیتے ہوئے بتایا کہ اتوار کو گیرسوپا ڈیم سے 70 ہزار کیوسک پانی چھوڑا گیا ہے جس کی وجہ سے پھر ایک بار شراوتی بیلٹ کے گیرسوپا، سڑلگی، سمسی، کُروا وغیرہ علاقوں میں پانی گھروں کے کمپاونڈ کے اندر بھر گیا ہے اور احتیاطی طور پر بوڑھے، بزرگ لوگوں کو محفوظ مقامات پرمنتقل کیا گیا ہے تاکہ پانی گھروں کے اندر داخل ہونے کی صورت میں دیگر لوگ فوری طور پر محفوظ مقام پر منتقل ہوسکیں۔ انہوں نے یہ بھی بتایا کہ ندی کے بالکل کنارے واقع پانچ مکانوں میں پانی گھس جانے کی وجہ سے مکین فوری طور پر گھر چھوڑ کر چلے گئے ہیں۔
بتایا گیاہے کہ پڑوسی ضلع شموگہ کے تیرتھاہلی، اگمبے اور ہوس نگر میں موسلادھار بارش کا سلسلہ جاری ہے جس کے نتیجے میں اُن پہاڑی علاقوں کا پانی سیدھے لنگن مکی پھر وہاں سے گیرسوپا ڈیم میں جمع ہوجاتا ہے، چونکہ یہ دونوں ڈیم حالیہ دنوں میں ہوئی بارش سے بھرے ہوئے ہیں، بارش ہونے کے نتیجے میں ڈیم سے پانی کا اخراج ضروری ہوجاتا ہے۔
شراوتی بیلٹ پر آئے سیلاب جیسی صورتحال کو دیکھتے ہوئے شراوتی بیلٹ کے ہی ولکی قصبہ میں واقع اتحاد پبلک اسکول میں کل پیر کو گیرسوپا اور سمسی کے بچوں کو چھٹی کا اعلان کیا گیاہے اسکول کے ایک ذمہ دار نے بتایا کہ اُن علاقوں میں گھروں کے کمپاونڈوں کے اندر پانی بھرا ہے ایسے میں وہاں کے بچوں کو ولکی اسکول میں لانا پھر اسکول چھوٹنے کے بعد اُن کے گھروں تک واپس پہنچانا دشوار ہے۔
اس تعلق سے ایک اعلیٰ سرکاری آفسر سے ساحل آن لائن نے رابطہ کیا تو انہوں نے بتایا کہ گیرسوپا ڈیم سے پانی کا اخراج گذشتہ چار دنوں سے برابر جاری ہے اور ڈیم کو اب تک بند نہیں کیا گیا ہے، البتہ ندی میں اُتار چڑھاو آنے کی صورت میں پانی کبھی نیچے اُترتا ہوگا اور کبھی پانی واپس ندی سے اُبل کر اطراف کے علاقوں میں داخل ہوجاتا ہوگا۔ان کے مطابق گیر سوپا ڈیم کا گیٹ فی الحال بند نہیں کیا گیاہے۔