بھٹکل 11/فروری (ایس او نیوز)   ہیبلے حدود میں کچروں کو گھر گھر جاکر اُٹھانے کی گاڑی  کا  آج پیر کو  ہیبلے پنچایت میں  افتتاح کیا گیا  جس کے ساتھ ہی  ہیبلے، جامعہ آباد، حنیف آباد اور مدینہ کالونی سمیت پاس پڑوس کے علاقوں  کے عوام  کو کچروں  سے  راحت ملنے کی توقع ہے۔ 

حنیف آباد ویلفئیر اسوسی ایشن، مدینہ ویلفئیر سوسائٹی سمیت اطراف کے دیگر ادارے و  اسپورٹس سینٹرس کافی عرصہ سے سرکاری حکام کو میمورنڈم پیش کرتے ہوئے علاقہ کی صفائی ستھرائی کو یقینی بنانے حد درجہ کوششوں میں مصروف تھے، اور سڑکوں کے اطراف کچروں کے ڈھیر جمع ہونے پر حکام کو متوجہ کراتے رہے تھے، ایسے میں اسی علاقہ میں واقع بھٹکل ویمن سینٹر کی جانب سے  ہیبلے پنچایت کو ایک گاڑی  عطیہ کرنے کے بعد  ان سبھوں کی کوششیں رنگ لاتی نظر آرہی ہیں۔ سبھی کاغذی کاروائیوں کے بعد متعلقہ  گاڑی کا آج    ہیبلے پنچایت صدر این ڈی موگیر نے ربن کاٹتے ہوئے   افتتاح کیا۔ اس موقع پر انہوں نے  بھٹکل ویمن سینٹر کا خصوصی طور پر شکریہ ادا کرتے ہوئے آئندہ بھی ہیبلے پنچایت کے ساتھ اپنا تعاون جاری رکھنے کی درخواست کی۔

ہیبلے پنچایت حدود کے عوام سے مخاطب ہوتے ہوئے  این ڈی موگیر نے  کہا کہ متعلقہ گاڑی کے ذریعے آئندہ  گھر گھر جاکر کچروں کو جمع کیا جائے گا، لیکن عوام کے لئے ضروری ہے کہ وہ بھی پنچایت کے ساتھ بھرپور تعاون کریں اور سوکھا کچرہ الگ اور گیلا کچرہ الگ کرکے  اپنے گھروں سے باہر لاکر  رکھیں، کمپاونڈ والے گھروالوں کے لئے ضروری ہے کہ وہ اپنے کمپاونڈ سے باہر کچروں کو لائیں اور متعلقہ گاڑی والوں کے حوالے کریں۔ انہوں نے عوام الناس سے درخواست کی کہ کسی بھی معاملے میں گاڑی پر کچروں کو جمع کرنے والے اہلکاروں  سے اُلجھنے کی کوشش نہ کریں، کوئی بھی مسئلہ پیش آنے کی صورت میں سیدھے ہیبلے پنچایت دفتر آکر اپنی شکایت پیش کریں۔

این ڈی موگیر صاحب نے اُن لوگوں کو متبنہ بھی کرایا کہ اب گھر گھر جاکر کچروں کو جمع کرنے کا کام شروع ہونے کے بعد سڑکوں کے اطراف کچروں کو پھینکنے  کا سلسلہ بند ہونا چاہئے اور اپنے علاقوں کو کچروں سے پاک و صاف رکھنا چاہئے، اس تعلق سے آئندہ اگر کچرہ سڑکوں کے اطراف پھینکا گیا تو پھر پنچایت کچرہ پھینکنے والوں اور جن جگہوں پر کچرہ پھینکا جاتا ہے، اُس  کے اطراف رہنے والوں کے خلاف کاروائی کرنے پر مجبور ہوگی۔

این ڈی موگیر نے کچروں کی نکاسی کے لئے گاڑی کی شروعات پر ہیبلے پنچایت کے تمام اراکین کا بھی شکریہ ادا کیا، جنہوں نے اس تعلق سے اپنی جانب سے ہرممکن تعاون پیش کیا تھا۔ اس موقع پر ہیبلے پنچایت کے نائب صدر جناب اِبّو علی سمیت دیگر تمام اراکین موجود تھے۔سماجی کارکنان میں مولانا عرفان ایس ایم ندوی، عبدالسمیع کولا، آفتاب دامودی و دیگر  بھی موجود تھے۔