اترکنڑا:9؍اگست   (ایس اؤ نیوز)اترکنڑا ضلع میں سیلاب کے حالات جاری ہیں۔ یلاپور  تعلقہ کے کارکونڈی دیہات کے قریب تٹی ہلی ڈیم کے سیلاب میں پھنسے 7لوگوں کو کوسٹل سکیورٹی فورس کے عملے نے انہیں بچایا۔

تٹی ہلی ڈیم سے کالی ندی کو پانی چھوڑنے کی وجہ سے کارکونڈی اور تاٹوال دیہات کے قریب 80خاندان عارضی بازآباد کاری مرکز منتقل ہوئے تھے لیکن یہ 7لوگ وہاں نہیں جانے سے سیلاب میں پھنس گئے بعد میں انہیں ساحل محافظ دستہ کے عملے نے بخیر وعافیت بچا کر مرکز پہنچایا۔

ضلع کے کچھ مقامات پر پُل، سڑکیں ٹوٹ پھوٹ کر بہہ گئے ہیں۔ ہلیال تعلقہ کھاناپور ۔تال گپا کی ریاستی شاہراہ کے دوسگی دیہات میں نالے کا پانی تیز رفتار سے بہنے کی وجہ سے پُل بھی بہہ گیاہے۔ ہلیال ۔یلاپور۔ڈانڈیلی کی سڑک سے متصل واقع کیسرولی دیہات کا پورا راستہ بربادہوگیاہے۔ یڈوگ دیہات کا پُل پانی کے حوالے ہونے سے دیہات کا دیگر مقامات سے رابطہ منقطع ہوگیاہے۔

کدرا ڈیم سے جمعرات کو بھی مسلسل 1.80لاکھ کیوسک پانی کالی ندی میں چھوڑ اگیا۔ جس کے نتیجےمیں کدرا اور ملاپور کی دیہات تقریباً ڈوب گئے ہیں۔ کاروار ۔ اوراد کی ریاستی شاہراہ پر کئی جگہوں پر تین چار فٹ تک پانی کھڑا ہے، ٹرافک نظام بری طرح متاثر ہے۔ انکولہ تعلقہ کے سنکسال کی قومی شاہراہ 63پر گنگاولی ندی کے پانی کا بہاؤ جاری رہنے سے ٹرافک نظام چوتھے دن بھی شروع نہیں ہوسکاہے۔

جمعرات کو 90825کیوسک پانی سوپا ڈیم میں جمع ہواہے، ڈیم بھرنے کے لئے صرف 8میٹر باقی ہے۔اس لئے ڈیم سے جمعرات کی شام 5500کیوسک پانی ندی کو چھوڑا گیا، اس میں مزید ضافہ ہونے کا امکان ہے۔ پیشگی اقدامات کے طورپر 28دیہات کے لوگوں کو منتقل کیاجارہاہے۔