بھٹکل میں ضلع انچارج وزیر منکال وئیدیا نے دیا تیقن: پرانے اتی کرم دار خوف زدہ نہ ہوں - نیا اتی کرم نہ کیا جائے
بھٹکل 21 / نومبر ( ایس او نیوز) ضلع انچارج وزیر منکال وئیدیا نے اتی کرم داروں کو تیقن دیتے ہوئے کہا کہ جنگلاتی زمینوں پر جن لوگوں نے بہت پہلے سے قبضہ کیا ہے اور ان کا جی پی ایس ہوچکا ہے تو ایسے اتی کرم داروں کو خوفزدہ ہونے کی ضرورت نہیں ہے ۔ البتہ اب پھر نئے سے زمینوں پر قبضہ جمانے کا کام نہ کیا جائے ۔
وزیر موصوف نے اپنے دفتر میں بلائی گئی پریس کانفرنس سےخطاب کرتے ہوئے کہا کہ سابقہ بی جے پی حکومت نے اتی کرم کو سکرم کرنے کے سلسلے میں کوئی پہل اور کارروائی نہیں کی ہے ۔ سکرم کمیٹی میں تعلقہ پنچایت اور ضلع پنچایت کے اراکین شامل ہیں اور ان اداروں کے انتخابات نہ ہونے کی وجہ سے کمیٹی کی میٹنگ طلب کرنا ممکن نہیں ہے ۔ منکال نے بتایا کہ اب ہماری حکومت جلد ہی تعلقہ اور ضلع پنچایت کے انتخابات منعقد کروائے گی اور اتی کرم کو سکرم کرنے کے تعلق سے بھی کارروائی کی جائے گی ۔ انہوں نے کہا کہ بھٹکل تعلقہ کے گرام پنچایت سطح پر کچرا نکاسی مراکز موجود ہونے کے باوجود اس کا صحیح استعمال نہیں ہو رہا ہے ۔ بعض مقامات پر کچرا نکاسی مراکز قائم کرنے کی مخالفت کی جا رہی ہے ۔ اس لئے تعلقہ پنچایت کے نام پر 5 ایکڑ سرکاری زمین تحویل میں لیتے ہوئے کچرا نکاسی مرکز قائم کیا جائے گا جہاں پر تمام گرام پنچایتوں کا کچرا ذخیرہ کرنے کی گنجائش ہوگی ۔
وزیر موصوف نے بتایا کہ کانگریس نے جو پانچ انتخابی گارنٹیاں دی تھیں ان میں سے چار گارنٹیاں جاری ہوچکی ہیں اور عوام اس سے بھرپور فائدہ اٹھا رہے ہیں اب ایک گارنٹی 'یووا نیدھی' اسکیم باقی ہے اور اسے آئندہ مہینے دسمبر یا جنوری میں جاری کیا جائے گا ۔