اڈپی، 22؍ مئی (ایس او نیوز) ہیگونجے گرام پنچایت حدود میں کوتھور کے قریب آج علی الصبح ایک شعلوں میں گھری  کار سے نوجوان جوڑی کی لاشیں برآمد ہوئیں جو پوری طرح جل کر خاکستر ہوچکی تھیں ۔ 

ذرائع سے ملی اطلاع  کے مطابق اس مضافاتی علاقہ میں صبح 3 بجے سڑک پر آگ کے شعلے دیکھ کر  گاوں کے لوگ سمجھے کہ شاید کہیں بجلی کے تار ٹوٹ کر گرنے سے آگ لگی ہے اور وہ معائنہ کے لئے دوڑ پڑے ۔ لیکن وہاں شعلوں میں گھری ایک کار دیکھ کرانہوں نے پولیس کو اطلاع کر دی ۔

برہماور پولیس اسٹیشن سے اہلکار فوراً جائے وقوع پر پہنچ گئے اور معائنہ کیا تو اس کار میں ایک نوجوان جوڑی کے خاکستر ڈھانچے پڑے ہوئے تھے ۔ تحقیق کرنے پر پتہ چلا کہ یہ نوجوان جوڑی آر ٹی نگر بنگلورو کی رہنے والی جن کے نام یشونت اور جیوتی ہیں ۔ دو دن قبل بنگلورو میں اس جوڑی کی گمشدگی کی رپورٹ درج کروائی گئی تھی ۔ 

بتایا جاتا ہے کہ ان دونوں نے منگلورو کے حسین نامی شخص سے یہ کار کرایے پر لی تھی اور آدھی رات کو شہر سے دور مضافات میں کار سمیت وہ دونوں جل کر خاکستر ہوگئے ۔ سمجھا جاتا ہے کہ گھر سے فرار ہونے والی عاشقوں کی اس جوڑی نے خود کشی کے مقصد سے کار کے اندر بیٹھ کر خود پر پٹرول چھڑکنے کے بعد آگ لگالی ہوگی ۔

پولیس نے کیس درج کرلینے کے بعد  اس ضمن میں مزید تحقیقات شروع کی ہے ۔