اڈپی10/مئی (ایس او نیوز)تقریباً آٹھ دن تک اڈپی اور اطراف میں پانی کی سپلائی بند رہنے کے بعد اب علاقہ وار سطح پر پانی کی فراہمی بحال کرنے کی کوشش کی جارہی ہے۔
اڈپی ڈپٹی کمشنر ہیپسبا رانی کے بیان کے مطابق چونکہ اڈپی کو پانی فراہم کرنے والا بجے ڈیم پوری طرح سوکھ چکا ہے، اس لئے اطراف کے تالابوں میں موجود پانی کو پمپنگ کے ذریعے ڈیم میں منتقل کیا جارہا ہے اور پھرنلوں اور ٹینکروں کے ذریعے عوا م تک پانی پہنچانے کی کوشش کی جارہی ہے۔پانی کی قلت سے نمٹنے کے لئے شہر کو چھ علاقوں میں تقسیم کیا گیا ہے۔اور مرحلہ وار ہر علاقے کو پانی فراہم کرنے کا منصوبہ بنایاگیا ہے۔ اس کے لئے ہر وارڈ میں ایک نوڈل آفیسر کو تعینات کیا گیا ہے۔ہر گھر کے لئے ایک ہزارلیٹر پانی تقسیم کیا جائے گا۔نلوں سے پانی فراہم کرنے کے تین دن بعد ٹینکر سے پانی فراہم کیا جائے گا۔
اسی کے ساتھ بجے ڈیم میں مٹی اور کیچڑ کا جو ڈھیر جمع ہوگیا ہے، اس کو صاف کرنے کے لئے ٹینڈر بھی طلب کیے گئے ہیں۔بورویل اور دیگر کنوؤں کی صفائی کرنے کا بھی منصوبہ بنایا گیا ہے۔