اڈانی دھوکہ دہی معاملہ پر اُڈپی اورکاروار کے ایل آئی سی دفتر کے سامنے کانگریس کارکنوں کا احتجاجی دھرنا
بھٹکل7 / فروری (ایس او نیوز) ہنڈنبرگ کی طرف سے اڈانی گروپ کی مالیاتی دھوکہ دہی سے متعلق جو انکشافات ہوئے ہیں اور اس کی وجہ سے شیئر بازار میں اڈانی گروپ کی جو گراوٹ آئی ہے اس کی مناسب جانچ کا مطالبہ کرتے ہوئے ساحلی کرناٹک کے اڈپی اور کاروار میں کانگریس کارکنوں کی جانب سے ایل آئی سی دفتر کے سامنے احتجاجی دھرنا دیا گیا۔
احتجاجی مظاہرین سے خطاب کرتے ہوئے اُڈپی میں کے پی سی سی جنرل سیکریٹری ایم اے غفور نے کہا کہ جملہ 29 افراد نے اس ملک کے بینکوں سے 10 لاکھ کروڑ روپے لوٹے ہیں ۔ ان میں سے ایک وجئے ملّیا کو چھوڑ کر باقی سب کے سب گجراتی ہیں ۔ ان سب نے اس ملک میں لاقانونیت کا ماحول پیدا کیا ہے ۔ ملک کی دولت لوٹنا بھی ایک قسم کی دہشت گردی ہے ۔ اس لئے حکومت کو چاہیے کہ اس معاملہ کی تحقیقات کی جائیں ۔
انہوں نے کہا کہ ہمارا احتجاج ایل آئی سی کے خلاف نہیں ہے بلکہ ایل آئی سی کے ساتھ ہو رہی ناانصافی کے بارے میں حکومت کو متنبہ کرنا ہے ۔ چند لوگ مل کر اس دیش کو لوٹ رہے ہیں ۔ مرکزی حکومت کو قصور واروں کے خلاف کارروائی کرتے ہوئے عوام کے ساتھ انصاف کرنا چاہیئے۔
کے پی سی سی کی پینلسٹ ورونیکا کرنلیو نے کہا کہ حکومت کو چاہیے کہ اڈانی معاملہ کی گہرائی سے جانچ کرکے عوام کو انصاف لائے ۔ اس معاملہ میں نریندرا مودی حکومت کو اپنی آنکھیں بند کرکے نہیں بیٹھنا چاہیے ۔ عوام کے ذریعہ لگایا گیا سرمایہ انہیں واپس ملنا چاہیے ۔
کاروار میں بھی احتجاجی مظاہرہ : ادھر کاروار سے ملی خبروں کے مطابق کانگریس پارٹی لیڈران اور کارکنان نے ایل آئی سی دفتر کے باہر احتجاجی مظاہرا کرتے ہوئے اس معاملہ کی عدالتی یا جوائنٹ پارلیمنٹری کمیٹی سے جانچ کروانے کا مطالبہ کیا ۔ مظاہرین کا کہنا تھا کہ ایس بی آئی اور ایل آئی سی ہمارے ملک کی شان ہے ۔ بھارتی شہریوں کی محنت کے پیسوں سے ان اداروں کی تشکیل ہوئی ہے ۔ مگر مشکل میں پھنسے ہوئے اڈانی گروپ میں سرمایہ کاری کے لئے مرکزی حکومت نے ایل آئی سی ، ایس بی آئی اور دیگر پبلک سیکٹر بینکوں پر دباو ڈالا ہے ۔ اڈانی گروپ بربادی کی طرف چلا گیا ہے ۔ اس میں ایل آئی سی نے بھاری سرماریہ کاری کی ہے ۔ اس کے برے نتائج ان اداروں پر پڑ رہے ہیں ۔ گزشتہ چند دنوں میں ایل آئی سی کے 39 کروڑ پالیسی ہولڈرس اور سرمایہ کاروں نے 3,060 کروڑ روپے گنوائے ہیں ۔ ایس بی آئی نے اڈانی گروپ کو بھاری قرضہ دیا ہے ۔ اس طرح عوام کی محنت کی کمائی اڈانی گروپ کے ذریعہ لوٹی گئی ہے ۔ اس کی مناسب تحقیقات ہونا ضروری ہے ۔اس موقع پر بڑی تعداد میں کانگریسی لیڈران اور کارکنان موجود تھے۔
بتایا گیا ہے کہ کانگریس کی طرف سے اسی طرح کے احتجاجی مظاہرے مہاراشٹرا، مدھیہ پردیش، ہماچل پردیش، جموں کشمیر سمیت ملک کے کئی شہروں اور علاقوں میں بھی کئے گئے ہیں اور مرکزی حکومت کے خلاف سخت ناراضگی ظاہر کی گئی ہے۔
