بھٹکل:25؍اگست   (ایس اؤ نیوز)انجمن حامئی مسلمین بھٹکل کے انجمن کالج آف ایجوکیشن (بی ایڈ کالج ) میں25اگست 2019بروز اتوار کو  طلبا و طالبات کے لئے دو روزہ شہری تربیتیورکشاپ  کا آغاز ہوا۔

مہمان خصوصی کی حیثیت سے شریک ہوئے بھٹکل ڈی وائی ایس پی ولنٹائن ڈیسوزا نے طلبا سے مخاطب ہوتے ہوئے کہاکہ طلبا اپنے ذہنوں میں خوف کو جگہ نہ دیں، خوف ، ڈر کو نکال پھینکیں، ورنہ اسی خوف کے دباؤ میں طلبا وطالبات خود کشی کرتےہیں۔ اس سلسلے میں بی ایڈ کالج کے اساتذہ کا اہم رول ہوتاہے وہ طلبا میں حوصلہ ، ہمت اور خود اعتمادی  پید اکریں اور ان کی مخفی صلاحیتوں اور قابلیتوں کو موقع دے کر ملک کے لئے مفید بنانے کا کام کرنےکی اپیل کی ۔ مہمان ِ اعزازی عبدالرحمن صدیقی نے بھی اپنے خیالات کااظہارکیا۔ انجمن حامئی مسلمین بھٹکل کے صدر عبدالرحیم جوکاکو نے پروگرام کی صدارت کی۔ پرنسپال ڈاکٹر زکیہ زرزری نے افتتاحی کلمات پیش کرتےہوئے شہری تربیتی ورکشاپکی غرض وغایت بیان کیں۔

ورکشاپ  کا آغاز فاطمہ مہناز کی تلاوت قرآن سے ہوا۔تلاوت کردہ آیات کا  مریم ہدی نے اردومیں  ،نسیمہ کنڑا میں اور رحیمہ بانونے انگریزی میں ترجمہ پیش کیا۔  تنزیلا نے نعت سنائی تو شریمتی اور چئیترا نے استقبالیہ ترانہ پیش کیا۔ مسرت تاج نے استقبال کیا تو عاصمہ فیضان اور جئے شری نے مہمانوں کا تعارف پیش کیا۔ صباح شیخ نے شکریہ اداکیا۔ ڈائس پر انجمن کے جنرل سکریٹری اسماعیل صدیق، ایڈیشنل جنرل سکریٹری محمد اسحق شاہ بندری ، کالج بورڈ سکریٹری آفتاب قمری وغیرہ موجود تھے۔