گنگولی 16/نومبر (ایس او نیوز) کنداپور تعلقہ کے گنگولی پولس تھانہ حدود میں دو مختلف ندیوں میں غرق ہوکر ہلاک ہونے کے دو الگ الگ واقعات پیش آئے ہیں اور دونوں کی نعشیں ندیوں سے برآمد کرلی گئیں ہیں۔
ذرائع سے ملی اطلاع کے مطابق ایک واقعہ سواپرنیکھا ندی میں پیش آیا، جبکہ دوسرا حادثہ گنگولی بندرگارہ پر پیش آیا۔ بتایا گیا ہے کہ گنگولی کے پڈکونے کا رہنے والا اشوک پجاری (45) کل جمعہ کو دھان کی فصل کاٹ کر ہاتھ پیر دھونے کے لئے ندی میں اُترا تھا، جس کے دوران پیر پھسل گیا اور وہ وہیں غرق ہوکر لاپتہ ہوگیا تھا، اسی طرح کل جمعہ کو گنگولی کے پنج گنگا ندی پر لنگر انداز ماہی گیری بوٹ پر اُڑیسہ کا رہنے والا 29 سالہ کھاگیشور ماجی بوٹ کی صفائی کررہا تھا جس کے دوران وہ ندی میں گرکر لاپتہ ہوگیا تھا۔ آج سنیچر کو دونوں لاشیں متعلقہ ندیوں سے برآمد کرلی گئیں ہیں اور پوسٹ مارٹم کے بعد اُن کے رشتہ داروں کے حوالے کردی گئی ہے۔
اس تعلق سے گنگولی پولس تھانہ میں معاملہ درج کیا گیا ہے اور پولس چھان بین کررہی ہے۔