مینگلور 29 / جنوری (ایس او نیوز)مینگلور سے قریب 60 کلو میٹر دور بیلتنگڈی کے گولی انگڈی علاقے میں پٹاخے تیار کرنے کے مقام پر زبردست دھماکہ ہونے کے نتیجہ میں تین افراد کی موت واقع ہوگئی جبکہ کئی افراد شدید زخمی ہوگئے ۔ حادثہ اتوارشام کو پیش آیا۔
دھماکے میں ہلاک ہونے والوں کی شناخت سوامی (55 سال)، ورگیس (68 سال) اور چیتن (25 سال) کے طور پر کی گئی ہے جبکہ بعض زخمیوں کے نام دنیش، کمار، کرن، کلّیشا، پریم اور کیشوا بتائے گئے ہیں ۔
معلوم ہوا ہے کہ 'سولڈ فائر ورکس، کے نام سے پٹاخوں کا یہ کارخانہ کوچوڈی کے پاس بشیر فارم نامی مقام پر قائم تھا اور گزشتہ کئی دہائیوں سے پٹاخوں کی تیاری اور سپلائی ہو رہی تھی ۔ جس وقت دھماکہ ہوا، تب یہاں 9 مزدور پٹاخے تیار کرنے کے کام پر معمور تھے ۔ دھماکے کے بعد ہلاک ہونے والوں میں ایک ہی لاش بر آمد کی جا سکی جبکہ بقیہ دو مہلوکین کے چھیتڑے دھماکے کے مقام سے سو میٹر کی دوری پر یہاں وہاں بکھرے ہوئے پائے گئے ۔ مقامی لوگوں کے مطابق دھماکہ اتنا شدید تھا کہ اس کی آواز چار کیلو میٹر دور تک سنائی دی تھی ۔
ایمرجنسی کال موصول ہونے پر بیلتنگڈی فائر سروس نے فوراً جائے واردات پر پہنچ کر آگ بجھانے کا کام کیا اور ایک سنگین طور پر زخمی شخص کو اسپتال منتقل کرنے کی کوشش کی مگر طبی امداد ملنے سے قبل ہی اس نے دم توڑ دیا ۔
ضلع پولیس سپرنٹنڈنٹ آف پولیس بی رشینت سمیت اعلیٰ پولیس افسران نے جائے واردات پر پہنچ کر معائنہ کیا ۔ بیلتنگڈی اور وینور پولیس کی ٹیم نے معائنہ اور ابتدائی تفتیشی کارروائی انجام دی ۔ اس موقع پر اخبارنویسوں سے گفتگو کرتے ہوئے ایس پی ریشینت نے بتایا کہ 2011۔12 سے اس کمپنی کے پاس لائسنس ہے۔ البتہ دھماکہ کیسے ہوا، اس کی جانچ کی جارہی ہے۔