بینگلور: سیاست میں دھرم ہونا چاہیے، لیکن دھرم میں سیاست نہ ہو -کانگریسی لیڈر جگدیش شٹر کا موقف
بینگلورو 21 / جنوری (ایس او نیوز) گزشتہ اسمبلی الیکشن کے موقع پر بی جے پی سے کانگریس میں شامل ہونے والے جگدیش شٹر نے کانگریس پر ہندو مخالف ہونے کا الزام لگانے والی بی جے پی کو کڑا جواب دیتے ہوئے کہا ہے کہ کانگریس ہندو مخالف نہیں ہے ۔ اگر کانگریس پارٹی ہندو مخالف ہوتی تو 135 سیٹیں کیسے جیت سکتی تھی ۔ اس لئے بی جے پی کو اب کانگریس کی مخالفت اور تبصرے کرنے سے باز آنا چاہیے ۔
کانگریس ایم ایل سی جگدیش شٹر نے کہا کہ رام مندر کا مطلب دھرم کی بات ہے ۔ دھرم کی علامت ہے ۔ یہ دھرم کی بیداری لانے اور دیش کو جوڑنے والی چیز رہنی چاہیے ۔ رام مندر کے مسئلہ پر سیاست نہیں ہونی چاہیے ۔ سیاست میں ھرم رہنا چاہیے لیکن دھرم میں سیاست نہیں ہونی چاہیے ۔ جن لوگوں کو دعوت ملی ہے ان میں سے بہت سے لوگ مختلف اسباب سے اس میں شرکت نہیں کررہے ہیںَ، یہ بات کانگریس نے کہی ہے ۔ اب اس پر بی جے پی والے تنقیدیں کر رہے ہیں ۔
جب اخبار نویسوں نے ان سے دوبارہ بی جے پی میں واپس جانے کے تعلق سے پوچھا تو انہوں نے کہا کہ بی جے پی سے کسی نے بھی مجھ سے رابطہ قائم نہیں کیا ہے ۔ اُس وقت بی جے پی میں میری توہین اور ہتک ہوئی تھی ۔ انہیں سبق سکھانا چاہتا تھا، میں نے سکھا دیا ہے ۔ کانگریس میں پوری طرح مطمئن ہوں ۔ میں کسی قسم کی توقع کے ساتھ کانگریس میں شامل نہیں ہوا تھا ۔ میں نے کئی بار کہا ہے کہ پارلیمانی الیکشن نہیں لڑوں گا ۔ اس لئے میں ٹکٹ کا امیدوار نہیں ہوں ۔