بھٹکل 21 / نومبر (ایس او نیوز) بھٹکل تعلقہ کے بینگرے میں واقع ایک الیکٹریکل شاپ میں رات کے وقت شٹر توڑ کر چوری کی واردات انجام دی گئی ۔
بتایا جاتا ہے کہ چوروں نے رامچندرا منجوناتھ شخص کی الیکٹریکل سامان کی دکان کے اندر موجود 5 ہزار روپے نقد رقم پر اپنا ہاتھ صاف کیا ۔ یہ واردات اتوار اور سوموار کے درمیان رات میں انجام دی گئی ہے ۔
مرڈیشور پولیس تھانہ کے افسران اور عملہ کے علاوہ فنگر پرنٹس ماہرین نے جائے واردات پر پہنچ کر معائنہ کیا ۔ چوروں کی گرفتاری کے لئے جال بچھایا گیا ہے ۔
عوام اس بات پر تشویش کر رہے ہیں کہ بینگرے کے علاقے میں یکے بعد دیگرے چوری وارداتوں میں اضافہ ہوتا جا رہا ہے ۔ بتایا جاتا ہے کہ گزشتہ ایک سال کے عرصے میں اس علاقے میں 30 سے زائد چوری کی وارداتیں انجام دی گئی ہیں ۔ بینگرے کراس پر واقع مندر کے دروازے کو چوری کے مقصد سے دو سے تین بار توڑا جا چکا ہے ۔ مقامی افراد کا الزام ہے کہ ان وارداتوں کی روک تھام اور چوروں کی گرفتاری کے تعلق سے پولیس کی طرف سے کوئی مستعدی اور چوکسی نہیں دکھائی جاتی اس لئے اب چوری ہونے پر پولیس کے پاس شکایت کرنے سے بھی لوگ باز آ رہے ہیں ۔