کلبرگی 24 / جنوری (ایس او نیوز) کوٹانورو (ڈی) گرام کے لومبینی باغ میں موجود بابا صاحب امبیڈکر کی مورتی کو چپلوں کا ہار پہنانے کی خبر عام ہونے پر شہر میں دلت تنظیموں کی طرف سے شدید احتجاجی مظاہرا کیا گیا جس کے بعد شہر میں تشدد اور توڑ پھوڑ کے واقعات پیش آئے۔ معاملہ منگل سامنے آیا جس کے بعد پورے کلبرگی شہر میں کشیدگی کا ماحول پیدا ہوگیا۔

اطلاع کے مطابق ایودھیا میں رام مندر کی افتتاحی تقریب کے پس منظر میں چیتاپور تعلقہ کے واڈی شہر میں شوبھا یاترا اور رام کی مورتی کا جلوس نکالا گیا تھا۔ اس موقع پر جو تصادم اور افراتفری ہوئی تھی اسی پس منظر میں امبیڈکر کی مورتی پر چپلوں کا ہار ڈالنے کی بات سامنے آئی ہے، جس پر احتجاج کرتے ہوئے ہزاروں مظاہرین نے دکانوں اور تجارتی مراکز کو زبردستی بند کروایا۔ جگت سرکل پر سنگ باری کے علاوہ احتجاجیوں نے بی جے پی کے ایم ایل سی کی ملکیت والے ایک پٹرول بنک پر بھی توڑ پھوڑ مچائی ۔ فرح آباد، جیورگی تعلقہ، تیمّاپوری سرکل سمیت ضلع کے بہت سارے علاقوں میں احتجاجیوں نے ملزمین کی فوری گرفتاری کا مطالبہ کرتے ہوئے راستہ روکو دھرنا دیا ۔ سڑک پر ٹائرس جلائے گئے۔ 

 ضلع کی ڈپٹی کمشنر فوزیہ ترنم نے پولیس کمشنر، ایس پی اور دیگر اعلیٰ افسران کے ساتھ جائے وقوع پر پہنچ کر معائنہ کیا۔ مورتی کے گلے سے چپلوں کا ہار اتروایا اور احتجاج کی صورتحال کا جائزہ لیا۔ اس موقع پر احتجاجیوں نے ملزمین کی گرفتاری کا مطالبہ کرتے ہوئے ڈی سی کو میمورنڈم دیا۔ اس کے جواب میں ڈپٹی کمشنر نے بتایا کہ اس واقعہ کی پوری تحقیقات کی جائے گی اور تحقیقات مکمل ہونے کے بعد ضلع انتظامیہ اپنی طرف سے اس باغ میں امبیڈکر کی نئی مورتی نصب کروائے گی۔ اس یقین دہانی کے بعد احتجاجی مظاہرا ختم کیا گیا۔

 اس تعلق سے پولیس نے بتایا کہ امبیڈکر مورتی کی توہین کرنے کے الزام میں دو مشتبہ افراد کو تحویل میں لیا گیا ہے جن سے تفتیش کی جا رہی ہے ۔ واڈی میں جو تصادم ہوا تھا اس پس منظر میں تین دن کے لئے وہاں امتناعی احکامات جاری کیے گئے ہیں.