بھٹکل میں چار سالہ بچے کی مشتبہ موت؛ منی پال میں پوسٹ مارٹم؛ پولیس کی طرف سے تفتیش جاری
بھٹکل 29 ڈسمبر (ایس او نیوز): یہاں بندر روڈ سکینڈ کراس میں ایک 4 سالہ لڑکا جو اپنی ماں کے ساتھ رہ رہا تھا مشتبہ طور پر فوت ہوگیا، اس تعلق سے بھٹکل ٹاون پولیس تھانہ میں معاملہ درج ہونے کے بعد پولس چھان بین کررہی ہے۔
مرنے والے معصوم بچے کی شناخت ارہان (4) کے طور پر کی گئی ہے۔ بتایا گیا ہے کہ بدھ کے روزبچہ جب شدید بیمارہوگیا تو اسے سرکاری اسپتال لایا گیا۔ لیکن لڑکے کی حالت نازک ہونے کی وجہ سے اسے یہاں کے ڈاکٹروں کے مشورہ پر مزید علاج کے لیے منی پال اسپتال لے جایا گیا۔ تاہم علاج بے اثر رہا اور لڑکا دم توڑ گیا۔
شکوک و شبہات:
اگرچہ متوفی لڑکے کی ماں کا کہنا ہے کہ لڑکا اس وقت شدید زخمی ہوا تھا جب بندر روڈ سیکنڈ کراس کے قریب سڑک کے کنارے کھڑی ایک گاڑی نے اسے ٹکر مار دی تھی، لیکن لڑکے کے جسم پر پائے جانے والے زخموں کے نشانات نے شکوک و شبہات کو جنم دیا ہے۔ لڑکے کے چہرے پر کچھ پرانے نشانات بھی پائے گئے ہیں۔ اس کے علاوہ اگر گاڑی کی ٹکر سے وہ زخمی ہوا تھا تو کونسی گاڑی نے ٹکر ماری تھی اوراُس وقت لڑکے کی ماں کہاں پر تھی، اس تعلق سے ابھی تک کوئی واضح بات سامنے نہیں آئی ہے۔ اس کے علاوہ بچے کی موت کو لے کر اس طرح کی اطلاعات بھی ہیں کہ بچے کی ماں پچھلے کچھ مہینوں سے اپنے شوہر سے دور ہے اور اس کے دوسرے ڈھائی سالہ بیٹے کے چہرے اور ٹانگ پربھی مشکوک زخم پائے جانے سے شکوک و شبہات گہرے ہوگئے ہیں۔ اس دوران بھٹکل کے سرکاری اسپتال کے ڈاکٹر جس نے ارہان کا ابتدائی علاج کیا تھا، نے بتایا کہ متوفی لڑکے کا وزن اس کی عمر کے مطابق نہیں تھا۔
جمعہ کے روزجب بچے کی میت تعلقہ کے گُلمی بلال کھنڈ میں اس کے والد کے گھر لائی گئی تو آس پاس کے لوگوں نے بچے کی ماں پر الزام لگانا شروع کردیا کہ ماں نے اپنے بچے کی پٹائی کی ہے۔ واقعے کے بارے میں بات کرتے ہوئے پولیس نے بتایا کہ نعش کا منی پال میں پوسٹ مارٹم کیا گیا ہے اور رپورٹ ملنے کا انتظار ہے، جس کے بعد ہی حقائق پر سے پردہ اُٹھ سکتا ہے اور رپورٹ کی بنیاد پر مزید کارروائی کی جاسکتی ہے۔
