اڈپی اور مینگلور میں کورونا گائیڈ لائنس پر سختی کے ساتھ عمل کرنے کا اعلان۔ چھوٹ کے دوران گاڑیاں چلانے کی نہیں ہوگی اجازت
اڈپی 9/ مئی (ایس او نیوز)ضلع اڈپی میں کورونا وباء بے قابو ہوجانے کے بعد ڈپٹی کمشنر جگدیشا نے اعلان کیا ہے کہ 10مئی سے کورونا گائیڈ لائنس لاگو کرنے میں سختی برتی جائے گی۔
پریس کانفرنس سے خطاب کرتے ہوئے ڈپٹی کمشنر نے بتایا کہ مختلف قوانین پر سختی کے ساتھ عمل کرنے کے لئے تازہ ہدایات جاری کی گئی ہیں جس کے تحت کل سے اشیائے ضروریہ کی خریداری کے لئے لاک ڈاون میں صبح 6 بجے سے 10 بجے تک جو چھوٹ دی گئی ہے اس دوران ہوٹل سے پارسل کھانا لینے یا اناج اور ترکاری ، گوشت وغیرہ خریدنے کے لئے لوگوں کو اپنے اپنے علاقے میں پیدل ہی جانا ہوگا۔ کسی بھی قیمت پر گاڑیوں کو سڑکوں پر نکلنے نہیں دیا جائے گا۔ اگر کوئی اس قانون کی خلاف ورزی کرے گا تو نہ صرف گاڑی ضبط کرلی جائے گی۔ بلکہ اپیڈیمک اور اینڈیمک قانون کے تحت اس کے خلاف کیس درج کیا جائے گا۔ پتہ چلا ہے کہ اسی طرح کی ہدایات مینگلور ایس پی نے بھی جاری کی ہیں اور بتایاہے کہ ضلع جنوبی کینرا میں بھی اشیائے ضروریہ کی خریداری کے لئے چھوٹ کے دوران لوگوں کو پیدل چل کر سامان خریدنے کی اجازت ہوگی، اگر کوئی گاڑی لے کر باہر نکلے گا تو اُن کی گاڑیوں کو ضبط کرلیا جائے گا اور اُن کے خلاف معاملات بھی درج کئے جائیں گے۔
اُڈپی ڈپٹی کمشنر نے بتایا کہ بین الریاستی اور بین الاضلاع سفر پر بھی پوری طرح پابندی رہے گی۔ البتہ صحت سے متعلقہ ہنگامی صورت حال میں ہی عوام کو اور عدالتی افسران وعملہ، محکمہ صحت سے متعلقہ افسران و عملہ کو اپنی ذمہ داریاں نبھانے کے لئے سفر کرنے کی اجازت رہے گی۔
ریلوے اور ہوائی سفر کرنے والے اپنے ٹکٹ کے ساتھ سڑک سے سفر کرسکیں گے۔ مزدوروں کے ٹھیکیداروں کو سخت وارننگ دیتے ہوئے ڈی سی نے کہا کہ کام نہ ہونے کی صورت میں ان مزدوروں کو سڑکوں پر یونہی چھوڑ دینے والوں کے خلاف کریمنل کیس داخل کیے جائیں گے۔ اگر ٹھیکیدار کے پاس کام نہیں ہے تو پھر ان مزدوروں کو 9 مئی کی شام تک ان کے گھر بھیج دینا ہوگا۔
انہوں نے یہ بھی بتایا کہ لاک ڈاون کے دوران ماہی گیری کی سرگرمیوں کے لئے بھی موقع نہیں رہے گا۔ عوام کے بندر پر جانے اور مچھلیاں خریدنے پر بھی پابندی رہے گی۔ شادی کی تقریب میں صرف 50 افراد شریک ہونے کی گنجائش رہے گی۔ دوسرے ضلع میں شادی کی تقریب رہنے پر تحصیلدار کی طرف سے اجازت لینے کے بعد سفر اختیار کرنا ہوگا۔ اس سے ہٹ کر مہندی کی تقریبات وغیرہ منعقد کرنے کے لئے اجازت نہیں دی جائے گی۔