شیموگہ ،2/اکتوبر(ایس او  نیوز/ایجنسی) شیموگہ کے شانتی نگر میں آنے والے راگی گڈا علاقہ میں اتوار کی شام میلاد النبی ؐ کے جلوس پر پتھراؤ کی وجہ سے کشیدگی پھیل گئی -اس تشدد اوراسے روکنے کیلئے کئے گئے پولیس لاٹھی چارج میں 3 افراد کے زخمی ہونے کی اطلاعات ہیں -10 افراد کو پولیس نے حراست میں لیا ہے- احتیاطی طور پر علاقے میں امتناعی احکامات نافذ کر دئیے گئے-

بتایا جاتا ہے کہ اتوار کے روز مقامی مسلمانوں نے میلاد النبی ؐ کے جلوس کا اہتمام کیا- یہ جلوس جب شہر کے راگی گڈا علاقے سے گزر رہا تھا تو نامعلوم شرپسندوں نے اس پر پتھراؤ کیا جس کے وجہ سے کچھ دیر کیلئے افرا تفری مچ گئی- صورتحال کو قابو میں کرنے کیلئے فوری راپڈ ایکشن فورس(آر اے ایف) اور کے ایس آر پی جوانوں کو تعینات کر دیا گیا- حالات اب زیر قابو بتائے جا رہے ہیں -

اس دوران شیموگہ کے ایس پی جے کے متھن کمار اور دیگر پولیس افسروں نے متاثرہ علاقے کا دور ہ کیا اور احتیاط کے طور پر دفعہ 144 کے تحت امتناعی احکامات نافذ کر دئے ہیں - بتایا جاتا ہے کہ تھراؤ کے سلسلہ میں پولیس نے 10ملزموں کو تحویل میں لیا ہے اور ان سے پوچھ گچھ کر رہی ہے-

بتایا جاتا ہے کہ پولیس حکام نے علاقے کے ذمہ داروں سے باتی چیت کی اور ان سے امن وامان برقرار رکھنے کیلئے تعاون طلب کیا ہے-