مینگلور 18/ جنوری (ایس او نیوز) مینگلور سے قریب 50 کلو میٹر دور ضلع دکشن کنڑا کے  پتور میں  دیہی پولیس نے چاقو گھونپ کر لڑکی کو قتل کرنے کے معاملہ میں اومیش (24 سال) نامی ملزم کو گرفتار کرلیا ہے جو سولیا کے موگیرو منے کا رہنے والا ہے ۔

    بتایا جاتا ہے کہ منگل صبح 11.30 بجے کے  ملزم اومیش اپنی رشتہ دار جئے شری (23 سال) کے گھر میں اس وقت گھس گیا جب وہ اکیلی تھی  اور اس کو چاقو گھونپ کر زخمی کرنے کے بعد فرار ہوگیا ۔ زخمی جئے شری کو اسپتال میں منتقل کرنے کی کوشش کی گئی لیکن اس نے راستے میں ہی دم توڑ دیا ۔ 

    مقتول لڑکی کی ماں گریجا کی طرف سے درج کی گئی شکایت میں کہا گیا ہے کہ اومیش کچھ عرصہ سے جئے شری کے عشق میں گرفتار ہوگیا تھا اور بار بار ان کے گھر آنے جانے لگا تھا ۔ لیکن جئے شری اس میں دلچسپی نہیں دکھا رہی تھی اور گزشتہ سال نومبر میں اس نے اُومیش کو صاف صاف بتا دیا تھا کہ وہ اس سے محبت نہیں کرتی ۔  اسی بات سے ناراض ہوکر اومیش نے جئے شری کو چاقو گھونپ دیا اور اس کی جان لے لی ۔

    پتور دیہی پولیس اسٹیشن کے سرکل انسپکٹر روی بی کی ٹیم نے ملزم اُومیش کو آج صبح گرفتار کر لیا اور اس کے قبضے سے ایک اسکوٹر اور قتل میں استعمال کیا گیا چاقو ضبط کر لیا ۔