بھٹکل:22؍اگست   (ایس اؤ نیوز)تعلقہ کے کوگتی میں واقع سنہیا خصوصی بچوں کے اسکول میں بھٹکل تحصیلدار وی پی کوٹرولی نے بھارت اسکاؤٹس اینڈ گائڈس کی شاخ کا افتتاح کیا۔

خطاب کرتےہوئے تحصیلدار نےکہاکہ ذہنی و جسمانی طورپر کمزور بچوں کو مین اسٹریم میں لانے کے لئے ہر ایک کا تعاون ضروری ہے۔ اسکول کی ترقی کے لئے انتظامیہ کی طرف سے جوکچھ ہوسکتاہے وہ سب تعاون دینے کا تیقن دیا۔ بھارت اسکاؤٹس اینڈ گائڈس کے ضلع چیف کمشنر ڈاکٹر جی جی سبھاہت نے پروگرام کی صدارت کرتے ہوئے کہاکہ خصوصی اسکول کے بچے مختلف میدانوں میں بہترین کارکردگی کا مظاہرہ کرتےہوئے اپنی اہلیت کو ثابت کیا ہے۔ ضلع کی سطح پر یہ دوسری خصوصی بچوں کی اسکول ہے جہاں بھارت اسکاؤٹس اینڈ گائڈس کی شاخ کا افتتاح کیاگیا ہے۔ انہوں نے بچوں کو ڈریس اور دیگر سہولیات فراہم کرنے کی بات کہی۔ مہمان خصوصی کی حیثیت سے شہری پولس تھانہ ایس آئی کوسومادھر ، بھارت اسکاؤٹس اینڈ گائڈس کے رابطہ عامہ افسر ایس ایس بھٹ لوکیشور، منگلا کو آپریٹیو سوسائٹی کے صدر پرمیشور دیواڑیگا، سماجی کارکن نذیر قاسمجی، ضلع خازن راجو ہیبار، تعلقہ سکریٹری کے پی بھنڈاری  وغیرہ موجود تھے۔ صدر مدرسہ مالتی ادیاور نے استقبال کرتےہوئے نظامت کی۔ اسکاؤٹس اینڈ گائڈ س کے افسر کری سدپا نے شکریہ اداکیا۔