پاپولر فرنٹ کی جانب سے اعلیٰ تعلیمی اسکالرشپ - 2019 کا اعلان؛ صحافت، قانون اور سوشل ورک کے طلبہ کو دی جائے گی ترجیح
نئی دہلی 31/جولائی (ایس او نیوز) پاپولر فرنٹ آ ف انڈیا (پی ایف آئی )کی جانب سے ضرورتمند اور ہونہار طلبہ کے لئے اسکالر شپ پروگرام 2019 کا اعلان کیا ہے جو ہائیر سکینڈری مکمل کرنے کے بعد اعلیٰ تعلیم حاصل کرنے کے خواہش مند ہوں۔ پی ایف آئی کے جنرل سکریٹری ایم محمد علی نے پریس ریلیز جاری کرتے ہوئے بتایا ہے کہ پاپولر فرنٹ مسلسل 9/سالوں سے اعلیٰ تعلیم کے لیے اس قومی اسکالرشپ اسکیم کو عملی جامہ پہنا رہی ہے۔
ریلیز میں اُن طلبہ سے درخواستیں دینے کے لئے کہا گیا ہےجو تعلیمی سال 20-2019 میں اپنا کورس کررہے ہوں ریلیز کے مطابق وہ تمام طلبہ جو پی جی کورس، ڈگری، ڈپلومہ یا کوئی بھی اعلیٰ تعلیم حاصل کر رہے ہیں جس کی میعاد ایک سال سے کم نہ ہو، اس اسکالرشپ کے اہل ہوں گے۔ البتہ صحافت، قانون اور سوشل ورک کے طلبہ کو ترجیح دی جائے گی۔ اس کے لیے www.popularfrontindia.org پر درخواست دے سکتے ہیں۔
درخواست 31/جولائی 2019 سے مذکورہ ویب سائٹ پر دستیاب ہوگی اور درخواست جمع کرنے کی آخری تاریخ 31/اگست 2019 ہوگی۔
پریس ریلیز کے مطابق پاپولر فرنٹ نے 12-2011 کے تعلیمی سال سے قومی سطح پر اسکالرشپ کی تقسیم کا آغاز کیا تھا جس کے تحت ملک کی 13/ریاستوں میں اب تک کل 12545(6024/طلبہ اور 6521/طالبات) کے درمیان 7/کروڑ 78/لاکھ روپئے کی اسکالرشپ تقسیم کی جا چکی ہے۔ پاپولر فرنٹ طلبہ کو اس بات کی ترغیب دیتی ہے کہ وہ اپنے کورس کی تکمیل یا کوئی ملازمت ملنے کے بعد ایک ذمہ دار شہری کی حیثیت سے واپس سماج کو اپنا تعاون پیش کریں۔