بھٹکل:31؍اگست(ایس اؤ نیوز)تعلقہ میں برستی بارش فی الحال تھمنے کا نام نہیں لے رہی ہے۔ بھٹکل میں سنیچر کو رات تک بارش برستی رہنے سے عوام کو  روزمرہ کے کاموں کو انجام دینے میں خلل واقع ہواہے۔

گرچہ موسلادھار بارش کے چلتے اسکول اور کالج کھلے رہے، طلبا کی بھی تعداد اچھی رہی، لیکن شہر میں عوامی چہل پہل زیادہ نظر نہیں آئی۔ شہری علاقے رنگین کٹا، شمس الدین سرکل کی قومی شاہراہ پر پانی جمع ہونے سے سواریوں کو گزرنے میں بڑی دقت پیش آئی اور ٹرافک نظام بری طرح متاثر رہا۔ مرڈیشور میں سڑکیں نالے بن گئے تھے تو بائیلور، مرڈیشور، شرالی ، چوتھنی ، منڈلی کے علاقوں کے کھیتوں میں پانی جمع ہونے کسانوں کی تکالیف میں اضافہ ہوگیا ہے۔ جالی پنچایت حدود میں ایک گھر کے حمام کی دیوار گرگئی ہے۔ محکمہ تحصیل کے افسران جائے وقوع پہنچ کر معائنہ کئے ہیں۔ اسی طرح چوتھنی کی ندی میں طغیانی کے سبب کنارے کے مکینوں کو چوکنا رہنے کہاگیا ہے۔ جمعہ کی صبح 8بجے سے سنیچر کی صبح 8بجے تک بھٹکل میں 156ملی میٹر بارش ہوئی ہے۔ اس طرح کل بارش کی پیمائش 3993.6ملی میٹر تک پہنچ گئی ہے۔