سمیر رضوی اور شاہ رخ بالترتیب چنئی سپر کنگز اور گجرات ٹائٹنز کا حصہ بنے : آئی پی ایل نیلامی میں ان کیپڈ کھلاڑیوں کی چمکی قسمت
دبئی:20؍دسمبر(ایس اؤ نیوز ) دبئی میں ہونے والی آئی پی ایل نیلامی میں ایسے بہت سارے ان کیپڈ کھلاڑی ہیں جن پر بڑی بڑی بولیاں لگائی گئیں تو کئی ایسےبڑے کھلاڑی بھی ہیں جن کی نیلامی میں بولی نہیں لگائی۔ ان کیپڈ کھلاڑی اتر پردیش سے تعلق رکھنے والے نوجوان بلے باز سمیر رضوی کو چنئی سپر کنگز نے خطیر رقم 8.40 کروڑ روپیوں کی بولی لگاکر اپنی ٹیم میں شامل کیا ہے۔ خیال رہے کہ سمیر رضوی کی بنیادی قیمت 20 لاکھ روپے تھی۔
اسی طرح گجرات ٹائٹنز نے شاہ رخ خان کو 7.40 کروڑ روپے میں اپنی ٹیم کا حصہ بنایا۔ شاہ رخ خان کی بیس پرائس 40 لاکھ روپے تھی۔ دہلی کیپٹلس نے کمار کشاگرا کو 7.20 کروڑ میں خریدا۔ اس نوجوان کھلاڑی کی بنیادی قیمت 20 لاکھ روپے تھی، لیکن دہلی کیپٹلس نے اسے اپنی ٹیم میں شامل کرنے کے لیے بڑی رقم خرچ کی۔ راجستھان رائلز نے شبھم دوبے کو 5.80 کروڑ میں خریدا۔ڈومیسٹک کرکٹ میں ودربھ کے لیے کھیلنے والے شبھم دوبے کی بنیادی قیمت صرف 20 لاکھ روپے تھی۔ ساتھ ہی رائل چیلنجرز بنگلور نے یش دیال کو 5 کروڑ میں خریدا۔ پہلے یش دیال گجرات ٹائٹنز کا حصہ تھے۔